ગુરુ થઈ રહ્યા છે અસ્ત, આ રાશિઓએ આર્થિક લેવડદેવડમાં રાખવી પડશે સાવધાની

ગુરુ મહારાજ 17 જાન્યુઆરીના રોજ સાંજે 5 વાગીને 52 મિનિટે મકર રાશિમાં અસ્ત થઈ રહ્યા છે. 14 ફેબ્રુઆરી સુધી ગુરુની આ જ સ્થિતિ રહેશે. ગુરુ પહેલા શનિ મકર રાશિમાં અસ્ત થયા હતા. ગુરુના અસ્ત થવાથી લગ્ન જેવા શુભ કાર્યો નહીં થઈ શકે. તો ઘણી રાશિઓની આર્થિક સ્થિતિ પર પણ આની અસર જોવા મળશે. ગુરુના અસ્ત થવાની અસર વેપાર અને બજાર પર પણ જોવા મળશે.

મેષ

મેષ રાશિના જાતકો માટે ગુરુનું અસ્ત થવું શુભ ફળોમાં કમી લાવશે. આ દરમિયાન આ રાશિના જાતકોને પડકારોનો સામનો કરવો પડી શકે છે. સાથે જ ધન હાનિ થઈ શકે છે. થોડી સાવધાની રાખીને કામ કરવું જરૂરી છે. ાર્થિક નિર્ણયો અને લેવડદેવડ મામલે સાવધાની રાખવી જરૂરી છે.

વૃષભ

વૃષભ રાશિના જાતકો માટે ગુરુનું અસ્ત થવું આવકની સમસ્યા લઈને આવી શકે છે. આ રાશિના જાતકોએ હાલ વેપાર અને નોકરીમાં સંયમ રાખવાની જરૂર છે. જો કે, સમજદારીથી નિર્ણય લેશો તો પરેશાનીઓથી બચી શકો છો. સમજી-વિચારીને રૂપિયા ખર્ચવા. મોટી ખરીદીની યોજના હાલ ટાળી દેવી.

મિથુન

મિથુન રાશિના જાતકો માટે ગુરુનું અસ્ત થવું શુભ નથી. આર્થિક લેવડદેવડમાં સાવધાની રાખવાની જરૂર છે. આ દરમિયાન બિનજરૂરી ખર્ચ પર રોક લગાવજો. કોઈ મોટો આર્થિક નિર્ણય લેવાનું ટાળવું જોઈએ. રોકાણ કરવાનું વિચારી રહ્યા હો તો ફેબ્રુઆરી બાદ કરજો. મકાન-વાહનની ખરીદીની યોજના હોય તો હાલ સમય તમારા પક્ષે નથી.

કર્ક

ગુરુ અસ્ત થતાં કર્ક રાશિના જાતકોના ખર્ચ વધી જશે. આ ઉપરાંત આર્થિક દ્રષ્ટિએ પણ સ્થિતિ સારી રાખવા નકામા ખર્ચ પર નિયંત્રણ રાખવું. જો કે, તમારી સ્થિતિ એકંદરે સંતુલિત રહેશે. આવકની સ્થિતિ સારી રહેવાથી ખર્ચનું ભારણ નહીં લાગે.

સિંહ

ગુરુ અસ્ત થવાથી સિંહ રાશિના જાતકોને કાર્યક્ષેત્રે નવી તક મળી શકે છે. આવકના નવા સ્ત્રોત બની શકે છે. વેપારમાં કોઈ રિસ્ક લેવાની હાલ જરૂર નથી. સ્થિતિ જેમ ચાલી રહી હોય તેમ ચાલવા દેજો. કંઈ નવું કરવાનો વિચાર હોય તો 17 ફેબ્રુઆરી પછી કરજો.

કન્યા

સફળતા મેળવવા માટે તમારે થોડી રાહ જોવી પડી શકે છે. ધૈર્યથી કામ લેવું. જો તમારા રૂપિયા ક્યાંય અટવાઈ શકે છે અથવા આવવામાં મોડું થઈ શકે છે. મહેનત અને ખંતથી કામ કરતા રહેજો. હાલ કરેલા કાર્યોનું ફળ ભવિષ્યમાં મળી જશે. શિક્ષણ સાથે જોડાયેલા લોકોએ પોતાના કાર્યક્ષેત્રે ધ્યાન કેંદ્રિત કરવાનું રહેશે.

તુલા

ગુરુ અસ્ત થવાથી તુલા રાશિના જાતકોને આર્થિક આયોજનો કરતાં પહેલા બેવાર વિચારવું અથવા અનુભવી લોકોની સલાહ લેવી જોઈએ. આ દરમિયાન કાર્યની ગતિ થોડી ધીમી રહેશે. યોજનાબદ્ધ રીતે કામ કરવામાં તમને થોડી મુશ્કેલી અનુભવાશે. પરિવારનો સાથ તમને બળ આપશે પરંતુ બિનજરૂરી ખર્ચ કરવાથી બચવું.

વૃશ્ચિક

કરિયર અને વ્યવસાય મામલે આ રાશિના જાતકો માટે સમય શુભ સાબિત થશે. આ દરમિયાન વ્યવસાય અને કરિયમાં સારી વૃદ્ધિ જોવા મળશે. ગુરુનું અસ્ત થવું તમારા માટે સુખદાયી સાબિત થશે.

ધન

ધન રાશિના જાતકોને હાલ ખાસ સાવધાની રાખવી પડશે. સ્પર્ધાત્મક પરીક્ષામાં સફળતા મેળવવા માટે વધુ મહેનતની જરૂર છે. કાર્યક્ષેત્રે શત્રુ પક્ષને હળવાશમાં લેવાની ભૂલ કદી ના કરશો. આર્થિક નુકસાન થઈ શકે છે.

મકર

મકર રાશિના જાતકો માટે ગુરુનું અસ્ત થવું મિશ્ર ફળદાયી છે. રાશિના સ્વામી શનિ અને ગુરુ તમારી રાશિમાં અસ્ત ચાલી રહ્યા છે ત્યારે મન વિચલિત રહેશે અને ખોટા નિર્ણય લઈ શકો છો. માટે આર્થિક બાબતોમાં અનુભવી લોકોની સલાહ લેવી. કાર્યક્ષેત્રે અધિકારીઓ સાથે તાલમેલ જાળવી રાખવો. ટેક્નિકલ અને સરકારી ક્ષેત્ર સાથે જોડાયેલા લોકો માટે સમય સારો રહેશે.

કુંભ

ગુરુની અસ્ત અવસ્થા નકામા ખર્ચ વધારશે. કોઈ વાતે મનમાં શંકા રહી શકે છે. માટે જ મૂંઝવણમાં મૂકાવ તેના કરતાં કોઈની સલાહ લઈ લેજો. મકાન, વાહન, પ્રોપર્ટીમાં રોકાણ કરતી વખતે સતર્ક રહેવું. ધર્મ અને કર્મ તેમજ શુભ કાર્યો પાછળ ખર્ચ થઈ શકે છે.

મીન

ગુરુ અસ્ત થવાથી મીન રાશિના જાતકો આળસ અનુભવશે અને કામ પર અસર થશે. જો કે, આર્થિક મોરચે તમારી ઈચ્છાઓ પૂરી થશે અને મજબૂત સ્થિતિમાં રહેશો. કાર્યક્ષેત્રે સહકર્મીઓ અને વરિષ્ઠજનો સાથે તાલમેલ જાળવી રાખજો.