શુક્રનું વૃશ્ચિક રાશિમાં ગોચર, 6 રાશિઓને વર્ષના છેલ્લા મહિનામાં થશે લાભ

વિજ્ઞાનની દ્રષ્ટિએ શુક્રને સૌથી ચમકતો તારો માનવામાં આવે છે અને આ ધરતીની સૌથી નજીક પણ છે. જ્યોતિષની દ્રષ્ટિએ શુક્ર એવો ગ્રહ છે જેની શુભ દશા તમારી કિસ્મત ચમકાવી શકે છે. વર્ષ 2020ના છેલ્લા મહિને એટલે કે ડિસેમ્બરમાં શુક્રનું રાશિ પરિવર્તન થવા જઈ રહ્યું છે. 11 ડિસેમ્બરના રોજ શુક્ર મંગળની રાશિ વૃશ્ચિકમાં પ્રવેશ કરશે.

શુક્રને જીવનમાં સુખ, ભૌતિક સુવિધા અને સંપન્નતાના કારક માનવામાં આવે છે. શુક્રની દશા પર જ દાંપત્યજીવન અને લવ રિલેશનશીપ સંબંધિત બાબતો આધાર રાખે છે. શુક્રના રાશિ પરિવર્તનથી કેટલીક રાશિઓને સુખ મળે છે તો કેટલાકના જીવનમાં સમસ્યાઓ ઊભી થાય છે. અહીં આજે એ 6 રાશિઓ વિશે જણાવીશું જેમને શુક્રના પરિવર્તનથી લાભ થવાનો છે.

મેષ

શુક્રનું ગોચર તમારી રાશિના આઠમા ભાવમાં થઈ રહ્યું છે. જેના કારણે તમારી લવ લાઈફની સુંદરતા વધશે અને દાંપત્ય જીવનમાં ખુશીઓ આવશે. તમારી વિજાતીય મિત્રતા વધશે અને તેનાથી ખાસ લાભ પણ થઈ શકે છે. નવું મકાન અથવા વાહન ખરીદવાના સંયોગ બની રહ્યા છે. ક્યાંકથી સારો લાભ થવાની આશા છે.

કર્ક

કર્ક રાશિના જાતકો માટે આ ગોચર ખાસ માનવામાં આવી રહ્યું છે. આ તમારી કુંડળીના ચોથા અને 11મા ભાવનો સ્વામી ગણાય છે. માટે આ તમારી રાશિમાં ખુશી અને લાભ સંબંધિત બાબતોને સંચાલિત કરે છે. ગોચરના પ્રભાવથી તમારી આર્થિક સ્થિતિમાં પહેલાથી વધુ સુધારો થશે. તમારી નિર્ણય લેવાની શક્તિ, પ્રેમ સંબંધો અને સંતાન સંબંધિત મામલે પણ લાભ થશે. પ્રેમ અને રૂપિયાની બાબતોમાં આ ગોચર ફળદાયી સાબિત થઈ શકે છે.

કન્યા

શુક્ર તમારી રાશિના સ્વામી બુધનો મિત્ર માનવામાં આવે છે. તમારી કુંડળીમાં બીજા અને નવમા ભાવના સ્વામી માનવામાં આવે છે. આ ગોચર તમારા માટે લાભ પ્રદાન કરનારું માનવામાં આવી રહ્યું છે. કુંડળીના બીજા ભાવમાં કમ્યુનિકેશન સ્કીલ તમારી બોલવાની કળા દર્શાવે છે. શુક્રના આ ગોચરથી તમારા પ્રયાસોને નવી પાંખો મળશે અને મહેનતનું સારું ફળ મળશે. તમે પહેલા કરતાં વધુ મહેનત કરવાનું શરૂ કરશો અને ભાગ્યનો સાથ મળશે. અટકેલા પ્રોજેક્ટ ફરી શરૂ થશે. ભાઈ-બહેનો સાથે કોઈ પ્રવાસ પર જઈ શકો છો.

તુલા

શુક્ર તમારી રાશિનો સ્વામી માનવામાં આવે છે. તમારી રાશિના જાતકો માટે શુક્રનું કોઈપણ ગોચર ખૂબ મહત્વ ધરાવે છે. તમારા લગ્ન ભાવના સ્વામી હોવાની સાથે આઠમા ભાવના પણ સ્વામી છે. ગોચર વખતે તમારી રાશિના બીજા ભાવમાં પ્રવેશ કરશે. જેના પ્રભાવથી જીવનમાં સઘળું સારું થશે. આ સાથે જ આવકના નવા સ્ત્રોત પણ બની રહ્યા છે. અચાનકથી ક્યાંક ધન પ્રાપ્તિ થઈ શકે છે. તમારે હાલના સમયે પરિવાર પર ખાસ ધ્યાન આપવાની જરૂર છે. તમારા સપના પૂરાં થશે.

મકર

શુક્ર તમારી રાશિના 11મા ભાવમાં પ્રવેશ કરી રહ્યા છે. આ તમારી રાશિમાં પાંચમા અને દસમા ભાવના સ્વામી માનવામાં આવી રહ્યા છે. ગોચરનો પ્રભાવ તમારી રાશિ પર એવો થશે કે જીવનના દરેક ક્ષેત્રે સફળતા મળશે. તમને રોકાણમાં લાભ થશે અને મહત્વાકાંક્ષાઓ પૂરી થશે. અચાનક આવક વૃદ્ધિના સંકેત મળી રહ્યા છે. સમાજમાં તમારુ માનપાન વધશે અને જીવનસ્તર સુધરશે. તમારી આર્થિક સ્થિતિ મજબૂત બનશે. આ ગોચર એકંદરે ફાયદાકારક સાબિત થવાનું છે.

મીન

મીન રાશિ પર શુક્રના ગોચરનો મિશ્રિત પ્રભાવ જોવા મળશે. કેટલીક બાબતોમાં લાભ થશે તો કેટલાક મામલે નુકસાન વેઠવું પડી શકે છે. આ ગોચરના પ્રભાવથી ખૂબ આર્થિક લાભ થશે. પરંતુ આની ખરાબ અસરથી પિતાના સ્વાસ્થ્ય પર અસર થઈ શકે છે. તમારા દાંપત્યજીવનમાં પણ મતભેદો થઈ શકે છે. જેના કારણે માનસિક રીતે પરેશાન રહેશો. તમારા ભાઈ-બહેન તમારી વાત માનશે અને તમારી આજ્ઞાનું પાલન કરશે.