હોન્ડાએ રજૂ કરી આકર્ષક City હેચબેક, સિડાનથી કેટલી છે અલગ?

નવી દિલ્હીઃ Hondaએ Honda City હેચબેક રજૂ કરી છે. આ કારને હાલ થાઈલેન્ડમાં રજૂ કરવામાં આવી છે અને આ કારનું વેચાણ પણ સૌથી પહેલા ત્યાં જ શરુ થવાનું છે. કંપનીએ સિટીનું હેચબેક વર્ઝન ખૂબ જ લાંબા સમય પછી રજૂ કર્યું છે. ભારતમાં આ કારની લોન્ચિંગ ડેટ નક્કી કરવામાં આવી નથી.

હોન્ડા સિટી સિડાનથી કેટલી અલગ હશે હેચબેક
હોન્ડા સિટી હેચબેક સિડાનના પ્લેટફોર્મ પર આધારિત છે. કારના લગભગ દરેક બોડી પેનલ્સ સિડાનથી જ લેવામાં આવ્યા છે. આ કારમાં સ્પોર્ટી લૂક માટે બ્લેક્ડ આઉટ ગ્રિલ અને ડાર્ક ક્રોમ ફિનિશિંગ આપવામાં આવ્યું છે. આ ઉપરાંત કાર 16 ઈંચ અલોય વ્હીલ્સ સાથે આવે છે. કારનું ઈન્ટિરિયર લગભગ સિટી સિડાનની જેમ જ છે. જેમાં ખાસ ફેરફાર જોવા મળ્યો નથી.

સિટી હેચબેકઃ એન્જિન અને પાવર
આ કારમાં 1.0 લીટર ટર્બો પેટ્રોલ એન્જિન આપવામાં આવ્યું છે. જે 122hp પાવર જનરેટ કરે છે. આ એન્જિનની સાથે જ CVT ગિયરબોક્સ આપવામાં આવ્યું છે. અલગ અલગ માર્કેટમાં કંપની આ કારને અલગ એન્જિન સાથે રજૂ કરી શકે છે.

તાજેતરમાં જ લોન્ચ થઈ સિડાન
થોડા સમય પહેલા લોન્ચ થયેલી હોન્ડા સિટી સિડાનમાં 1.5L i-VTEC એન્જિન આપવામાં આવ્યું છે. અને તે 6 સ્પીડ મેન્યુઅલ ગિયરબોક્સ અને CVT બન્ને ઓપ્શનમાં ઉપલબ્ધ છે. 6,000 rpm પર એન્જિન 121PSનો પાવર અને 4,300 rpm પર 145Nmનો પીક ટોર્ક જનરેટ કરે છે. પેટ્રોલ એન્જિનવાળી નવી હોન્ડા સિટીનું મેન્યુઅલ વેરિયન્ટ 17.8 કિલોમીટર પ્રતિ લીટરની એવરેજ આપશે. કંપનીનો દાવો છે કે, CVT વેરિયન્ટ 18.4 કિલોમીટર પ્રતિ લીટરની એવરેજ આપશે.