ટાટા મોટર્સની ઈલેક્ટ્રીક કાર Nexon ખરીદનારા ગ્રાહકે કરી 'રેન્જ'ની ફરિયાદ

નવી દિલ્હી: તમે નોંધ્યું હશે કે પેટ્રોલ કે ડીઝલ કાર વેચતી કંપનીઓ તેના માઈલેજ અંગે જે દાવા કરે છે તે ઓન રોડ ક્યારેય નથી મળતું. શું આવું જ ઈલેક્ટ્રીક કારમાં પણ સંભવ છે? આવા જ એક મામલામાં દિલ્હી સરકારના પરિવહન વિભાગે ટાટા મોટર્સને કારણદર્શક નોટિસ મોકલી છે. કંપનીની કાર નેક્સોનનું ઈલેક્ટ્રીક મોડેલ ખરીદનારા એક ગ્રાહકની ફરિયાદ બાદ આ નોટિસ મોકલવામાં આવી છે. ગ્રાહકની ફરિયાદ છે કે કંપનીએ સિંગલ ચાર્જમાં કાર કેટલા કિલોમીટર ચાલે છે તે અંગે કરેલા દાવા કરતાં તેણે ખરીદેલી કારની રેન્જ સાવ ઓછી છે.

ફરિયાદ કરનારા ગ્રાહક દ્વારા જણાવાયું છે કે, તેમણે સફદરજંગ એન્ક્લેવ સ્થિત ડીલર પાસેથી નેક્સોનનું ઈલેક્ટ્રીક મોડેલ ખરીદ્યું હતું, જેનું 03 ડિસેમ્બર 2020ના રોજ રજિસ્ટ્રેશન થયું છે. કંપનીનો દાવો છે કે આ કાર સિંગલ ચાર્જમાં 312 કિલોમીટર દોડે છે, પરંતુ ગ્રાહકની ફરિયાદ છે કે તેની ગાડીએ ક્યારેય કંપનીના જણાવ્યા અનુસાર, સિંગલ ચાર્જમાં આટલું અંતર કાપ્યું જ નથી.

કંપની સિંગલ ચાર્જમાં 312 કિમીની રેન્જનો દાવો કરે છે, પરંતુ ગાડી ખરીદનારા ગ્રાહકનું કહેવું છે કે તેની કાર ક્યારેય સિંગલ ચાર્જમાં 200 કિમીથી વધારે ચાલી જ નથી. આ મામલે તેણે દિલ્હી ટ્રાન્સપોર્ટ વિભાગને ફરિયાદ કરી હતી, અને તેના પર કાર્યવાહી કરતાં ટ્રાન્સપોર્ટ વિભાગે ટાટા મોટર્સને નોટિસ પાઠવી છે.

ગ્રાહકનું તો ત્યાં સુધી કહેવું છે કે તેણે ડીલરના જણાવ્યા અનુસાર તમામ વાતનું ધ્યાન રાખ્યું હોવા છતાં ગાડીનું પર્ફોમન્સ નથી સુધરી રહ્યું. ઉલ્લેખનીય છે કે, દિલ્હી ઈલેક્ટ્રીક વ્હીકલ પોલિસી અંતર્ગત ઈલેક્ટ્રીક કાર ખરીદનારાને પર બેટરીના દર kWh પર 10 હજાર રુપિયાની સબસિડી મળે છે, અને તે વધુમાં વધુ દોઢ લાખ રુપિયા સુધી મળી શકે છે.

ટાટા મોટર્સના પ્રવક્તાએ નોટિસ મળ્યાની પુષ્ટિ કરતાં જણાવ્યું હતું કે તેઓ આ સમસ્યાનું સમાધાન લાવવા દરેક સંભવ કોશીશ કરી રહ્યા છે. તેમણે એમ પણ કહ્યું હતું કે ગાડીની 312 કિમીની રેન્જ ઓટોમોટિવ રિસર્ચ અસોસિએશન ઓફ ઈન્ડિયાના સર્ટિફિકેટ પર આધારિત છે. આ સિવાય ઈલેક્ટ્રીક કારની રેન્જ એસીનો ઉપયોગ કેટલો થાય છે અને વ્યક્તિની ડ્રાઈવિંગ સ્ટાઈલ કેવી છે તેના પર પણ આધાર રાખે છે.