હવે કારમાં પાછળના ભાગે વધારાની 4 એરબેગ્સ મળશે અને જેના લીધે કિંમતમાં થઈ શકે છે આટલો વધારો

નવી દિલ્હીઃ સાયરસ મિસ્ત્રીનું અમદાવાદ-મુંબઈ હાઈવે પર થયેલા અકસ્માતમાં મોત થયા બાદ અકસ્માતના આંકડાથી લઈને કારની અંદર બેઠેલા લોકોની સુરક્ષા સહિતના મુદ્દાઓની ચર્ચા થવા લાગી છે. હવે કારમાં સવાર મુસાફરોની સુરક્ષાને ધ્યાનમાં રાખીને પાછળની સીટ પર પણ એરબેગને ફરજિયાત કરવાનો નિર્ણય લેવામાં આવ્યો છે જેના કારણે કારની કિંમતમાં વધારો થવાનો ગણગણાટ શરુ થઈ ગયો છે. જોકે, સરકારી એજન્સી દ્વારા કાઢવામાં આવેલા ભાવ પ્રમાણે વધારાની એરબેગ્સ માટે માત્ર 6000 રૂપિયા વધારે ચૂકવવા પપડશે. એટલે કે જો 5 વર્ષ માટે કારની લોન લીધી હોય તો પ્રતિ માસ 120 રૂપિયા વધારાના ભરવા પડશે, જેની કિંમત મિડસેગમેન્ટ કાફેમાં એક કોફીના કપ જેટલી થાય છે.

અમારા સહયોગી ટાઈમ્સ ઓફ ઈન્ડિયાને મળેલા ડેટા પ્રમાણે, સાઈડ એરબેગ્સ અને કર્ટન એરબેગ એમ ચાર એરબેગ્સની સરેરાશ કિંમત મુખ્ય એરબેગ નિર્માતા દ્વારા કાર કંપનીઓને જે કિંમતે એરબેગ પૂરી પાડે છે તેના આધારે નક્કી કરવામાં આવી છે. જોકે, કેટલીક કાર બનાવતી કંપની દ્વારા દાવો કરવામાં આવ્યો છે કે વધારાની એરબેગ્સ લગાવવાથી કારની કિંમતમાં 17,000થી 18,000નો વધારો થઈ શકે છે.

કેન્દ્રીય રોડ ટ્રાન્સપોર્ટ મંત્રી નીતિન ગડકરીએ આ દાવાને ફગાવતા જણાવ્યું કે એકવાર સ્કેલ થઈ ગયા પછી દરેક એરબેગની સરેરાશ કિંમત 1,000થી લઈને 4,000 રૂપિયા સુધી થઈ શકે છે. તેમના મંત્રાલય દ્વારા વાહનોમાં સવાર મુસાફરોની સુરક્ષામાં સુધારો કરવા માટે વધારાની એરબેગ્સ માટેની જોગવાઈને અનિવાર્ય બનાવવાનો પ્રસ્તાવ કર્યો છે. વિશ્વ સ્તરે વાહનમાં બેઠેલા લોકોની સુરક્ષા માટે વધુ ધ્યાન આપવામાં આવી રહ્યું છે.

સૂત્રોનું માનીએ તો તમામ કાર નિર્માતા આ પ્રસ્તાવના પક્ષમાં છે. TOI દ્વારા કેટલાક ડેટાની તપાસ કરવામાં આવી જેમાં માલુમ પડ્યું કે ભારતના કાર નિર્માતાઓ દ્વારા યુરોપમાં મોકલાતા મૉડલમાં કર્ટન એરબેગ્સનો સમાવેશ કરવામાં આવ્યો છે, જ્યારે ભારતમાં આ મૉડલનું વેચાણ થાય છે પરંતુ તેમાંથી એરબેગ્સ ગાયબ છે. જ્યારે કેટલીક કાર બનાવતી કંપનીઓ પોતાના મૉડલ્સ બ્રાઝીલ અને અર્જન્ટિના મોકલે છે તેમાં 6 એરબેગ્સનો સમાવેશ થાય છે, જ્યારે દેશમાં વેચાતા મૉડલ્સમાં માત્ર 2-4 એરબેગ્સ લગાવેલી હોય છે.

ઓટો ઈન્ડસ્ટ્રી સાથે સંકળાયેલા અંદરના લોકોએ જણાવ્યું કે જે દેશમાં કાર મોકલવામાં આવે છે ત્યાના નિયમોનું પાલન કરવું જરુરી હોય છે અને તેના કારણે નિકાસ કરવામાં આવતા વાહનોમાં સેફ્ટી ફીચર્સનું ધ્યાન રાખવું પડે છે.