આ કંપનીએ કોરોના વચ્ચે પણ એક મહિનામાં 41300 કારનું કર્યું વેચાણ

નવી દિલ્હીઃ કોરોનાકાળમાં લોકડાઉન વચ્ચે ઓટોમોબાઈલ ઈન્ડસ્ટ્રીને ભારે ઝાટકો લાગ્યો છે પરંતુ હવે અનલોક સાથે સાથે માર્કેટ ઝડપથી ગતિ પકડી રહ્યું છે. તેની પાછળનું એક કારણ એ પણ છે કે લોકો ડરને કારણે લોકો પબ્લિક ટ્રાન્સપોર્ટનો ઉપયોગ કરવાનું ટાળી રહ્યા છે. હ્યુન્ડાઈ મોટર ઈન્ડિયા લિમિટેડે જુલાઈ મહિનામાં કુલ 41,300 ગાડીઓનું વેચાણ કર્યું. જેમાંથી 38,200 ગાડીઓ ભારતમાં જ્યારે 3100 ગાડીઓનું એક્સપોર્ટ કરવામાં આવ્યું છે.

હ્યુન્ડાઈ મોટર ઈન્ડિયા લિમિટેડના સેલ્સ, માર્કેટિંગ અને સર્વિસ ડિરેક્ટર તરુણ ગર્ગે જુલાઈના વેચાણ પર ટિપ્પણી કરતા કહ્યું- એક જવાબદાર કંપની હોવાને કારણે અમારું કર્તવ્ય છે કે દેશની આર્થિક સ્થિતિ ફરી પાટા પર લાવવાની દિશામાં પોતાનું યોગદાન આપવું. હવે લોકોની જરૂરિયાત ટ્રેન્ડ મુજબ બદલાઈ રહી છે અને લોકો ખાનગી વાહનમાં જવાનું પસંદ કરી રહ્યા છે. માર્કેટમાં ડિમાન્ડને પૂરી કરવા માટે અમે સતત પ્રયત્ન કરી રહ્યા છીએ.

તેમણે વધુમાં કહ્યું કે જુલાઈ 2020માં કુલ 38200 યૂનિટનું વેચાણ ભારતમાં થયું જ્યારે જુલાઈ 2019ની તુલનામાં તેના અંદાજીત 98 ટકા છે. એટલે કે ગત વર્ષે આ સમયગાળામાં જેટલી કાર વેચાઈ હતી તેટલી જ કાર આ વર્ષે પણ તે સમયગાળામાં કંપનીએ વેચી છે. તેમાં સૌથી વધારે માંગ ક્રેટા, વેન્યૂ, વર્ના, ઈલાઈટ આઈ 20 અને નિઓસની છે.