મારુતિ સુઝુકી લાવશે પોતાની પહેલી ઈલેક્ટ્રિક કાર, જાણો ક્યારે થશે લૉન્ચ

Shailesh Thakkar | I am Gujarat 21 Dec 2017, 7:48 pm

maruti suzuki all sets to lauch its first electic vehicle in india by 2020 — મારુતિ સુઝુકી લાવશે પોતાની પહેલી ઈલેક્ટ્રિક કાર, જાણો ક્યારે થશે લૉન્ચ

સુઝુકી-ટોયોટાએ કર્યા MOU

મારુતિ સુઝુકી ભારતમાં પોતાની પહેલી ઈલેક્ટ્રિક કાર આવનારા કેટલાક વર્ષોમાં લૉન્ચ કરવાની છે. આ માટે કંપનીએ ટોયોટા સાથે MOU સાઈન કર્યા છે. મારુતિ સુઝુકી 2020 સુધીમાં પોતાની પ્રથમ ઈલેક્ટ્રિક કાર બજારમાં ઉતારશે તેવી શક્યતા છે. આ કરાર અંતર્ગત બંને કંપની ઈન્ડિયન ઑટોમોબાઈલ માર્કેટમાં ઈલેક્ટ્રિક વ્હીકલ લૉન્ચ કરવા માટે સાથે મળીને કામ કરશે.

મારુતિ સુઝુકીના બેનર હેઠળ વેચશે કાર્સ

એગ્રિમેન્ટ પ્રમાણે બંને જાપાની કંપનીઓ- ટોયોટા અને સુઝુકી પોતાની તૈયાર કરેલી કાર્સ મારુતિ સુઝુકીના બેનર હેઠળ વેચશે. ઉલ્લેખનીય છે કે, ભારતમાં 2030 સુધીમાં સંપૂર્ણપણે ઈલેક્ટ્રિક કાર્સ હોવાનું લક્ષ્યાંક રાખવામાં આવી રહ્યું છે.

બધા માટે ફાયદાનો સોદો: RC ભાર્ગવ

મારુતિ સુઝુકી ઈન્ડિયાના ચેરમેન RC ભાર્ગવે આ બાબતે જણાવ્યું કે, ‘ટોયોટા અને સુઝુકી વચ્ચેનું આ જોઈન્ટ વેન્ચર મારુતિ માટે ફાયદાકારક રહેશે કારણ કે કંપનીએ ભારતમાં ઈલેક્ટ્રિક કાર્સ લૉન્ચ કરવા માટે એવી બંને કંપનીઓનો સપોર્ટ લીધો છે જેમની પાસે ઈલેક્ટ્રિક વ્હીકલની ટેક્નોલૉજી છે, જ્યારે મારુતિ પાસે હાલમાં તે ટેક્નોલૉજી નથી. આવામાં જોઈન્ટ વેન્ચર બધા માટે ફાયદાનો સોદો છે.’

2020 સુધી લૉન્ચ કરવાનો ટાર્ગેટ

ભારતમાં ઈલેક્ટ્રિક કાર લૉન્ચ કરવા બાબતે ભાર્ગવે કહ્યું કે, ‘2020માં ઈલેક્ટ્રિક કાર લૉન્ચ કરવાનો વાયદો અમે નહીં જાપન આપી રહ્યું છે અને તેઓ જ્યારે કંઈક કહે છે તો કરીને દેખાડે છે.’ આ ઈલેક્ટ્રિક વાહનોની કિંમત વિશે વાત કરતા ભાર્ગવે જણાવ્યું કે, ‘શરૂઆતમાં આ કાર્સની કિંમત વધારે હશે પણ જેમ-જેમ તેના સ્પેરપાર્ટ્સ ભારતમાં બનતા થઈ જશે તેમાં ઘટાડો આવશે.’

ગુજરાતમાં બનશે પ્રથમ ઈલેક્ટ્રિક કાર

ભાર્ગવે વધુમાં કહ્યું કે, કંપનીએ આ કાર્સની સ્થિતિ મજબૂત બનવવા માટે ઈકૉ-સિસ્ટમ બનાવવાની જરૂર છે. આ ઈકૉ-સિસ્ટમ ટોયોટા અને સુઝુકીના જોઈન્ટ વેન્ચરથી બનાવવામાં આવશે અને ભારતમાં મારુતિ તેને પોતાના વાહનોમાં યુઝ કરશે. આ કાર્સમાં લાગેલી બેટરીને મારુતિ સુઝુકી ગુજરાત પ્લાન્ટમાં બનાવવામાં આવશે.