જાન્યુઆરીથી મોંઘી થશે મારુતિની કાર્સ, જાણો કેટલો થશે વધારો

I am Gujarat

મારુતિ સુઝુકીએ કરી ભાવવધારાની જાહેરાત

દેશની સૌથી મોટી કાર નિર્માતા કંપની મારુતિ સુઝુકી ઈન્ડિયા લિમિટેડ (MSIL) જાન્યુઆરી 2018થી પોતાના તમામ મોડલ્સની કિંમતોમાં 2 ટકાનો વધારો કરવાનું વિચારી રહી છે. કંપની તરફથી આપવામાં આવેલી જાણકારીમાં આનુ કારણ વધતો જતો ઈનપુટ કૉસ્ટ હોવાનું જણાવવામાં આવ્યું છે.

નવી કાર લેવાનું વિચારો છો? ઉતાવળ કરો

કંપની હેચબેક ઑલ્ટો 800થી લઈને યૂટિલિટી વ્હીકલ એસ-ક્રૉસ સુધી વેચે છે જેની કિંમત 2.45 લાખ રૂપિયાથી લઈને 11.29 લાખ રૂપિયા (તમામ એક્સ-શોરૂમ, દિલ્હી) સુધીની છે. કંપનીના એક પ્રવક્તાએ જણાવ્યું કે, ‘અત્યાર સુધી સાધારણ ઉતાર-ચઢાવને અમે જાતે એડજસ્ટ કરી રહ્યાં છીએ પણ કોમોડિટીના ભાવ ધીમે-ધીમે વધવાને કારણે અમારે જાન્યુઆરીથી આનો બોજ ગ્રાહકો પર નાખવો પડશે. આગામી મહિનાથી તમામ મોડલ્સના ભાવમાં આશરે 2 ટકા સુધીનો વધારો થઈ જશે. જુદા-જુદા મોડલ્સ અને તેના સ્પેસિફિકેશન અનુસાર કિંમતમાં વધારો થશે.’

આ કંપનીઓ પણ વધારશે પોતાની ગાડીઓની કિંમત

ઉલ્લેખનીય છે કે, ટાટા મોટર્સે પણ ઈનપુટ કૉસ્ટ વધવાનો કારણે આગામી મહિનાથી પોતાની પેસેન્જર ગાડીઓની કિંમતમાં 25000 સુધી વધારવાની ઘોષણા કરી હતી. મહિન્દ્રા એન્ડ મહિન્દ્રા (M&M) પર જાન્યુઆરીથી પોતાની ગાડીઓમાં 1.5થી 2 ટકાનો વધારો કરશે. ટોયોટા કિર્લોસ્કર મોટર (TKM)એ 3 ટકા, હોન્ડા કાર્સ ઈન્ડિયાએ 1થી 12 ટકા અને સ્કોડા ઑટો ઈન્ડિયાએ 2-3 ટકા કિંમત વધારવાની ઘોષણા કરી છે.