મારુતિ સુઝુકી S-Pressoને ક્રેશ ટેસ્ટમાં 0 સ્ટાર, ટાટા મોટર્સે આ રીતે ઉડાવી મજાક

નવી દિલ્હીઃ ગ્લોબલ સેફ્ટી કાર્યક્રમ હેઠળ NCAPએ ભારતીય માર્કેટમાં વેચાતી કારનું ક્રેશ ટેસ્ટ રેટિંગ જાહેર કર્યું છે. પરિણામમાં અનેક કાર એવી છે. જેણે આશા કરતા તદન ઓછા અંક મેળવ્યા છે. સૌથી વધારે ચર્ચામાં મારુતિ સુઝુકી S-Presso છે. જેણે ગ્લોબલ NCAP ક્રેશ ટેસ્ટમાં 0 અંક મેળવ્યા છે. જે ખૂબ જ ચિંતાજનક છે. આ તકનો ફાયદો ઉઠાવતા ટાટા મોટર્સે મારુતિ એસપ્રેસોના ખરાબ સેફ્ટી રેટિંગ માટે સોશિયલ મીડિયા પર મજાક ઉડાવી હતી.

શું છે ટાટા મોટર્સનું ટ્વીટ?
ટાટા મોટર્સે ટ્વીટ કરતા એક તસવીર નાખી હતી. જેમાં તૂટેલો કોફી મગ જોવા મળે છે અને બીન્સ વીખરાયેલા જોવા મળે છે. જેના પર લખ્યું છે કે, 'We Don't break that easy (અમે એટલી સરળતાથી તૂટતા નથી)' કંપનીએ પોતાના કેપ્શનમાં લખ્યું કે,'ડ્રાઈવિંગની એક અલગ જ મજા છે, જોકે, ત્યારે જ જ્યારે તે સુરક્ષા સાથે હોય, બુક કરો પોતાના સેગમેન્ટની સૌથી સુરક્ષિત કાર ટિયાગો' આ ટ્વીટને ગ્લોબલ NCAPના પ્રેસિડન્ટ અને સીઈઓ ડેવિડ વોર્ડે પણ શૅર કરી છે અને લખ્યું છે કે,'મારુતિ સુઝુકીને હવે જાગવાની જરુર છે.'


મારુતિ સુઝુકી એસ-પ્રેસોના ફીચર્સ
મારુતિ સુઝુકી એસ-પ્રેસો એક એન્ટ્રી લેવલ હેચબેક કાર છે. કારને એડલ્ટ પ્રોટેક્શન મામલે ઝીરો સ્ટાર અને ચાઈલ્ડ ઓક્યુપન્સી મામલે 2 સ્ટાર મળ્યા છે. કારનું VXI વેરિયન્ટ ટેસ્ટ કરવામાં આવ્યુ હતું. કારની કિંમત 3.70 લાખ રુપિયાથી શરુ થાય છે અને તેના ટોપ મોડલની કિંમત 5.13 લાખ રુપિયા છે.

સેફ્ટી ફિચર્સ ખરા પણ 0 રેટિંગ
જો વાત કરવામાં આવે સેફ્ટી ફિચર્સની તો તેમાં ચાઈલ્ડ પ્રૂફ રિયર ડોર લોક, ડ્રાઈવર સાઈડ એરબેગ, પેસેન્જર સાઈડ એરબેગ, ABS વિથ EBD, સ્પીડ એલર્ટ સિસ્ટમ, સીટબેલ્ટ રિમાઈન્ડર, રિવર્સ પાર્કિંગ સેન્સર જેવા સેફ્ટી ફીચર્સ મળે છે. તો જો વાત કરવામાં આવે ટાટા મોટર્સની તો એન્ટ્રી લેવલ હેચબેક સેગમેન્ટમાં ટાટા ટિયાગોને 4 સ્ટાર મળ્યા છે.