​10 વર્ષમાં 16 બિઝનેસ ગૃહની '$10 અબજ ક્લબ'માં એન્ટ્રી

રાજેશ માસ્કરન્હસ

મુંબઈ:ભારતીય અર્થતંત્રની વૃદ્ધિમાં છેલ્લા દાયકામાં ભલે ચઢ-ઊતર રહી હોય, પણ ભારતીય કંપનીઓમાં સંપત્તિસર્જન નવા સ્તરે પહોંચ્યું છે. 16 વધુ બિઝનેસ ગૃહો માર્કેટ કેપની રીતે છેલ્લાં 10 વર્ષમાં ’10 અબજ ડોલર ક્લબ’માં પ્રવેશ્યાં છે. 2007માં આવી માત્ર 7 કંપની હતી.

આઇશર મોટર હોય કે ગોદરેજ કે પછી ઇન્ડિયાબુલ્સ, ભારતના નવા ‘વેલ્થ ક્રિયેટર્સ’ની છલાંગમાં કન્ઝ્યુ રિટેલ બિઝનેસની ઝડપી આર્થિક વૃદ્ધિએ મહત્ત્વની ભૂમિકા ભજવી છે. યોગ્ય દિશામાં વ્યૂહરચના સાથે સતત આગળ વધનારાં બિઝનેસ ગૃહોએ છેલ્લા દાયકામાં સેન્સેક્સની 1.3 ગણી વૃદ્ધિની તુલનામાં પાંચ ગણો ઉછાળો દર્શાવ્યો છે.

જ્યારે અનિલ અંબાણી જૂન સહિતનાં કેટલાંક બિઝનેસ ગૃહો ઋણબોજની મુશ્કેલીમાં ફસાયાં છે. અદાણી, કોટક મહિન્દ્રા, ભારતી, ઇન્ડિયાબુલ્સ સહિતનાં બિઝનેસ ગૃહોએ જોરદાર વૃદ્ધિ દર્શાવી છે.

આઇશરનું માર્કેટ કેપ 2007ના રૂ.696 કરોડથી વધીને રૂ.76,000 કરોડ થયું છે. સમાન ગાળામાં અદાણી જૂથનું માર્કેટ કેપ રૂ.1.17 લાખ કરોડથી વધીને રૂ.5,129 કરોડ થયું છે. હિંદુજા, એશિયન પેઇન્ટ્સ, ગોદરેજ, કોટક મહિન્દ્રા અને ટીવીએસનું માર્કેટ કેપ છેલ્લા દાયકામાં 10થી 16 ગણું ઊછળ્યું છે. 7 લિસ્ટેડ કંપની સાથે ઇન્ડિયાબુલ્સ ગ્રૂપનું માર્કેટ કેપ 10 વર્ષમાં 5 ગણું વધ્યું છે. ફાઇનાન્સ, બેન્કિંગ, ઓટો, ઓટો એન્સિલિયરી, કન્ઝ્યુ ગૂડ્ઝ અને ફાર્મા સહિતનાં સેક્ટર્સમાં સક્રિય જૂથોએ સૌથી ઝડપી સંપત્તિસર્જન કર્યું છે.

2007માં 10 અબજથી વધુ માર્કેટ કેપવાળા જૂથમાં માત્ર 7 બિઝનેસ ગૃહ સામેલ હતાં. જેમાંથી અનિલ અંબાણી જૂથની સંપત્તિ રૂ.1.19 લાખ કરોડથી લગભગ 57 ટકાના ઘટાડા સાથે રૂ.51,000 કરોડ થઈ છે.