અમદાવાદમાં 10 ગ્રામ સોનાના ભાવમાં એક જ દિવસમાં 1200 રુપિયાનો જંગી કડાકો

અમદાવાદ: કોરોનાની રસીની ક્લિનિકલ ટ્રાયલ સફળ રહેતા તેના અંગે વધેલા આશાવાદ વચ્ચે સોનાની કિંમતમાં કડાકો બોલાયો છે. અમદાવાદમાં મંગળવારે એક જ દિવસમાં 10 ગ્રામ સોનાની કિંમતમાં 1200 રુપિયાનો ઘટાડો થયો હતો.

સોમવારે 52,400 (પ્રતિ 10 ગ્રામ) રુપિયાની આસપાસ ટ્રેડ કરી રહેલું સોનું મંગળવારે 51,200 રુપિયા પર પહોંચ્યું હતું. ચાંદીમાં પણ કરેક્શન જોવા મળ્યું હતું. સોમવારે ચાંદીનો પ્રતિ કિલો ભાવ 62,500 હતો, જે મંગળવારે ઘટીને 60,500 થઈ ગયો હતો.

અમદાવાદ સ્થિત બુલિયન ટ્રેડર હેમંત ચોકસીના જણાવ્યા અનુસાર, કોરોનાની રસી બજારમાં જલ્દી આવી જવાની આશાએ આંતરરાષ્ટ્રીય માર્કેટમાં સોના અને ચાંદીના ભાવમાં સતત ઘટાડો જોવા મળી રહ્યો છે, અને તેની અસર ઘરઆંગણે પણ દેખાઈ રહી છે.

સૂત્રોનું માનીએ તો ગોલ્ડ એક્સચેન્જ ટ્રેડેડ ફંડ (ETF)માં પણ સોનાની કિંમતમાં ઘટાડાને કારણે સતત આઉટફ્લો જોવા મળી રહ્યો છે. આ બધા વચ્ચે સોનાની કિંમતમાં થઈ રહેલા ઘટાડાને કારણે જ્વેલર્સને હવે એક આશાની કિરણ દેખાઈ રહી છે.

છેલ્લા ઘણા સમયથી સોનાના ભાવ આસમાને પહોંચવાના કારણે તેની ડિમાન્ડમાં જોરદાર ઘટાડો થયો છે, અને સોના-ચાંદીના દાગીના બનાવતા જ્વેલર્સની હાલત કફોડી બની ગઈ છે. વળી, કોરોનાની બીજી લહેર વચ્ચે લગ્નપ્રસંગ પર પણ તેની અસર દેખાતા હવે સોનાની કિંમત ઘટે અને તેના કારણે તેની ડિમાન્ડ વધે તેવી આશા અમદાવાદના જ્વેલર્સ રાખીને બેઠા છે.