નિફ્ટીનો પ્રથમ પડાવ 12,450: મેટલ શેર્સમાં મજબૂતી જોવા મળશે

73226043 વૈભવ શાહ, એમડી, મોનાર્ક નેટવર્થ કેપિટલ

શેરબજારમાં ધીમો પણ મક્કમ સુધારો જોવા મળી રહ્યો છે. વૈશ્વિક સ્તરે યુએસ-ઇરાન તંગદિલી બાદ ઘેરાયેલાં યુદ્ધનાં વાદળો હાલમાં વિખેરાઈ ગયાં છે. યુએસ-ચીન વચ્ચે ટ્રેડ ડીલ પણ થવા જઈ રહી છે અને તેના કારણે વૈશ્વિક બજારો મજબૂત બન્યાં છે. સ્થાનિક સ્તરે પણ બજેટ આવી રહ્યું છે અને સરકાર તરફથી અર્થતંત્રની ગાડી પાટી પર ચઢાવવા માટે મહત્ત્વનાં પગલાં ભરવામાં આવે તેવી પ્રબળ શક્યતા જોવાઈ રહી છે. જેને લક્ષ્યમાં રાખીને બજારમાં પ્રિ-બજેટ રેલીનાં ચિહ્નો જોવા મળી રહ્યાં છે.

ગયા સપ્તાહાંતે નવેમ્બર માટે રજૂ થયેલો IIP ડેટા પોઝિટિવ આવ્યો હતો. જેને માર્કેટ અર્થતંત્રમાં સુધારાના સંકેત તરીકે લઈ શકે છે. ત્રીજા ક્વાર્ટરનાં પરિણામોની સીઝનની શરૂઆત સારી રહી છે. ઇન્ફોસિસનાં પરિણામો સારાં આવ્યાં છે. શુક્રવારે સ્થાનિક બજાર બંધ થયા બાદ પરિણામ રજૂ થયાં હતાં અને કંપનીના એડીઆરમાં 7 ટકાનો ઉછાળો નોંધાયો હતો. આમ સોમવારે ભારતીય એક્સ્ચેન્જિસ ખાતે પણ શેરના ભાવમાં ઉછાળાની સંભાવના છે.

આ સઘળાં પરિબળો બજારને મજબૂતી પૂરી પાડનારાં છે અને માર્કેટ આગામી સમયગાળામાં નવી ટોચ દર્શાવતું રહેશે. નિફ્ટી માટે મારો પ્રથમ ટાર્ગેટ 12,450નો છે. ત્યાર બાદ 12,600નો સ્તર જોવા મળી શકે છે. બજેટની વાત કરીએ તો સરકારે પુન: લાગુ પાડેલા લોંગ ટર્મ કેપિટલ ટેક્સ (LTCG)નો કોઈ લાભ નહીં દેખાતાં તે દૂર કરવામાં આવે તેવી પૂરી શક્યતા બજાર જોઈ રહ્યું છે.

ઉપરાંત સિક્યોરિટીઝ ટ્રાન્ઝેક્શન ટેક્સ (STT)માં પણ ઘટાડાની સંભાવના છે અને આ સ્થિતિમાં મિડ-કેપ્સ અને સ્મોલ-કેપ્સમાં ખરીદી જોવા મળી શકે છે. હાલમાં લાર્જ-કેપ્સ અને મિડ-કેપ્સ વચ્ચે વેલ્યુએશન ગાળો ઐતિહાસિક સ્તરે છે અને તેથી રોકાણકારો એક સેગમેન્ટમાં પ્રોફિટ બૂક કરીને અન્ય સેગમેન્ટનાં ક્વોલિટી કાઉન્ટર્સ તરફ વળી શકે છે. જોકે લાર્જ-કેપ્સમાં નાનો પ્રોફિટ બૂક અનેક ક્વોલિટી મિડ-કેપ્સમાં નવુ ફંડ ફ્લો ઊભો કરી શકે છે.

સ્ટોક સ્પેસિફિક વાત કરીએ, તો ટાટા મોટર્સમાં બ્રેક આઉટ આવ્યું છે અને કાઉન્ટરમાં ₹222-239ના સ્તરની શક્યતા છે. અદાણી એન્ટરપ્રાઇઝમાં મજબૂતી જોવા મળી શકે છે. કંપનીને ત્રણ એરપોર્ટ્સ માટે સિક્યોરિટી ક્લિયરન્સ મળ્યાં છે અને તેમાં ₹235-250ના સ્તરની શક્યતા છે.

જૂથની અન્ય કંપની અદાણી પોર્ટ પણ ટેક્‌નિકલી મજબૂત જોવા મળે છે. શેર ₹396ના સ્તર પર બંધ આપશે તો ₹422 અને 450ના સ્તર દર્શાવે તેવી શક્યતા છે. યુએસ-ચીન ટ્રેડ ડીલ થતાં મેટલ શેર્સમાં મજબૂતી જોવા મળી શકે છે. હું ટ્રેડર્સને 12,200ના સ્ટોપલોસે લોંગ પોઝિશન જાળવવાની સલાહ આપીશ. 12,350ના સ્તર પર બંધ આપે તો નવું લોંગ કરી શકાય.