ટામેટાંના ભાવ 15 દિવસમાં ઘટશેઃ ICAR

નવી દિલ્હી:કિલો દીઠ રૂ. 100ના ભાવે સ્પર્શી ગૃહિણીઓના બજેટને ખોરવી નાખનારા ટામેટાંના ભાવ આગામી 15 દિવસમાં ઘટશે તેમ ઈન્ડિયન કાઉન્સિલ ઓફ એગ્રિકલ્ચરલ રિસર્ચ(આઈસીએઆર)ના એક અધિકારીએ જણાવ્યું હતું.

દક્ષિણ ઉપરાંત દેશના અન્ય રાજ્યોમાંથી પુરવઠો વધવાને કારણે એકાદ પખવાડિયામાં ટામેટાંના ભાવ નીચા જશે તેમ અધિકારીએ જણાવ્યું હતું. ઉલ્લેખનીય છે કે છેલ્લાં 1 મહિના દરમિયાન ટામેટાંના છૂટક ભાવ કિલો દીઠ રૂ.100ની વિક્રમી ટોચે સ્પર્શતા સામાન્ય માણસની થાળીમાંથી ટામેટાં લગભગ ગાયબ થઈ ગયા હતાં.

ગ્રાહક બાબતોના મંત્રાલયના આંકડા અનુસાર 29 જુલાઈના રોજ કોલકાતામાં ટામેટાંનો કિલોનો છૂટક ભાવ રૂ.95, દિલ્હીમાં રૂ.92, મુંબઈમાં રૂ.80 તથા ચેન્નઈમાં રૂ.55 હતો.
અમદાવાદમાં ટામેટાંનો છૂટક ભાવ કિલો દીઠ રૂ.65 હતો. ટામેટાંનો પાક લેતાં રાજ્યોમાં પણ ટામેટાંનો ભાવ આસમાને આંબ્યો હતો. શિમલામાં તેનો 1 કિલો ટામેટાંનો ભાવ રૂ. 83 જ્યારે બેંગાલુરૂમાં 1 કિલો ટામેટાંનો ભાવ રૂ.75 જોવાયો હતો. આઈસીએઆરના ડેપ્યુટી ડિરેક્ટર જનરલ એ.કે. સિંઘના જણાવ્યાં અનુસાર આગામી 15 દિવસમાં દક્ષિણના રાજ્યો તથા ટામેટાંનું ઉત્પાદન કરતાં અન્ય રાજ્યોમાંથી પુરવઠો વધતાં જ કિંમતો ઘટશે તેમ મારું માનવું છે.