2018માં વિદેશી ફંડ્સની વેચવાલી ₹1 લાખ કરોડનો આંક વટાવી જવાની ધારણા

67123048 નવી દિલ્હી:વિદેશી પોર્ટફોલિયો રોકાણકારો અથવા એફપીઆઇએ 2018માં ભારતના મૂડીબજારમાં આશરે ₹1 લાખ કરોડની વેચવાલી કરી છે. તેનાથી ભારતના મૂડીબજારમાં વિદેશી ફંડ્સના રોકાણના સંદર્ભમાં 2018 સૌથી ખરાબ વર્ષ પુરવાર થવાની ધારણા છે.

ડિપોઝિટરીઝ અને એક્સ્ચેન્જના ડેટા મુજબ 2017માં એફપીઆઇએ ભારતના ઇક્વિટી અને ડેટ માર્કેટમાં આશરે ₹2 લાખ કરોડનો ચોખ્ખું રોકાણ કર્યું હતું. 2018માં અત્યાર સુધી એફપીઆઇએ ભારતના બજારથી આશરે ₹87,000 કરોડ પાછા ખેંચી લીધા છે. ચાલુ વર્ષે હવે આશરે 15 ટ્રેડિંગ સપ્તાહ બાકી છે. એનાલિસ્ટ્સે જણાવ્યું હતું કે આરબીઆઇના ગવર્નરનું અણધાર્યું રાજીનામું અને રાજકીય સ્થિતિને કારણે આ ટ્રેન્ડ ચાલુ રહેવાની ધારણા છે.

ચાલુ વર્ષે ડેટ માર્કેટમાં વિદેશી ફંડ્સની વેચવાલી આશરે 7.6 અબજ ડોલર (આશરે ₹52,700 કરોડ) રહી છે અને ઇક્વિટી માર્કેટ્સમાં તેમનો ચોખ્ખો આઉટફ્લો આશરે 4.6 અબજ ડોલર અથવા આશરે ₹35,000 કરોડ રહ્યો હતો. તેનાથી કુલ આઉટફ્લો આશરે ₹87,700 કરોડ (12 અબજ ડોલર) રહ્યો છે. જો નાણાપ્રવાહનો ટ્રેન્ડ નહીં બદલાય તો વિદેશી ફંડ્સના રોકાણના સંદર્ભમાં 2018નું વર્ષ 2002 પછીથી સૌથી ખરાબ બની શકે છે.

2018 પહેલાં સળંગ છ વર્ષ સુધી એફપીઆઇએ ભારતનાં બજારોમાં ચોખ્ખી ખરીદી કરી હતી. 2017માં વિદેશી નાણાપ્રવાહ ₹51,000 કરોડ, 2016માં ₹20,500 કરોડ, 2015માં ₹17,800 કરોડ, 2014માં ₹97,000 કરોડ, 2013માં ₹1.13 લાખ કરોડ અને 2012માં ₹1.28 લાખ કરોડ રહ્યો હતો.