યસ બેન્કના શેરમાં 23 ટકાનો કડાકો

71402598 નવી દિલ્હી:ફાઇનાન્શિયલ સિસ્ટમમાં દબાણની ચિંતા વચ્ચે યસ બેન્કના શેરમાં સતત પાંચમા સેશનમાં ભારે વેચવાલી હતી. બીએસઇમાં બેન્કના શેરમાં 23 ટકાનો કડાકો બોલાયો હતો. શેર ઇન્ટ્રા-ડે 29.91 ટકા તૂટીને ₹29.05ના ઘણાં વર્ષોના નીચા સ્તરે પટકાયો હતો. સેશનના અંતે શેર 22.80 ટકા તૂટીને ₹32એ બંધ આવ્યો હતો.

રેલિગેર બ્રોકિંગના વાઇસ પ્રેસિડન્ટ (રિસર્ચ) અજિત મિશ્રાએ જણાવ્યું હતું કે મુશ્કેલીમાં રહેલી રિયલ એસ્ટેટ અને હાઉસિંગ ફાઇનાન્સ કંપનીઓમાં ધિરાણની ચિંતામાં વધારો થતાં બેન્ક શેરોમાં ભારે વેચવાલી આવી હતી. યસ બેન્કના શેરમાં સેન્સેક્સ અને નિફ્ટીના શેરમાં સૌથી વધુ ધોવાણ થયું હતું. છેલ્લાં પાંચ સેશનમાં યસ બેન્કના શેરમાં 43 ટકાનું ધોવાણ થયું છે. પાંચ સેશનમાં બેન્કના વેલ્યુએશનમાં આશરે ₹4,828.94 કરોડનું ધોવાણ થયું છે.

યસ બેન્કના પ્રમોટર રાણા કપૂર અને તેમના ગ્રૂપના એકમો બેન્કના 2.16 ટકા શેર વેચ્યા હતા, એમ નિયમનકારી માહિતીમાં જણાવાયું હતું. આ હિસ્સાનું વેચાણ 25થી 27 સપ્ટેમ્બર વચ્ચે ઓપન માર્કેટ ટ્રાન્ઝેક્શન મારફત થયું હતું. ઇન્ડિયાબુલ્સ હાઉસિંગ ફાઇનાન્સમાં ધિરાણની ચિંતાને કારણે સોમવારે યસ બેન્કના શેરમાં 15 ટકાનું ધોવાણ થયું હતું. બેન્કે એક નિવેદનમાં જણાવ્યું હતું કે બજારની તાજેતરની અફવા અને અહેવાલથી બેન્કના શેરને અસર થઈ છે. અમે આ અફવાનું ખંડન કરીએ છીએ.