ચાલુ વર્ષે મોબાઇલ ટેરિફમાં 25-30% ઉછાળાની શક્યતા

73412579 કલ્યાણ પરબત

I am Gujarat

કોલકાતા:ભારતના એક અબજથી વધુ મોબાઇલ ગ્રાહકોએ 2020નું વર્ષ પૂરું થતાં સુધીમાં બિલમાં તીવ્ર વૃદ્ધિનો સામનો કરવા તૈયાર રહેવું પડશે. યુઝર દીઠ સરેરાશ રેવન્યૂ (ARPU) હજુ નીચી હોવાથી ટેલિકોમ કંપનીઓ ભાવમાં ઓછામાં ઓછો 25-30 ટકા વધારો કરે તેવી શક્યતા છે.

એનાલિસ્ટ્સના જણાવ્યા અનુસાર સુપ્રીમ કોર્ટે એડ્જસ્ટેડ ગ્રોસ રેવન્યૂ (AGR) મુદ્દે રાહત નહીં આપતાં વોડાફોન આઇડિયા અને ભારતી એરટેલે મોટી ચુકવણી કરવી પડશે. છેલ્લા કેટલાક સમયથી ચાલી રહેલી આશંકા સાચી ઠરશે અને વોડાફોન આઇડિયા બંધ પડશે તો ભારતી એરટેલ અને રિલાયન્સ જિયોની જ હાજરીને કારણે એનાલિસ્ટ્સને મોબાઇલ ટેરિફમાં મોટી વૃદ્ધિનો અંદાજ છે.

IIFL સિક્યોરિટીઝના ડિરેક્ટર સંજીવ ભસિને જણાવ્યું હતું કે, “ARPUs હજુ જિયોની એન્ટ્રી પહેલાંના ₹180-200ના લેવલ કરતાં નીચા છે અને છેલ્લાં ત્રણ વર્ષમાં ટેલિકોમ સંબંધી ગ્રાહક ખર્ચમાં ઘટાડો નોંધાયો છે ત્યારે ટેલિકોમ કંપનીઓ માટે ચાલુ વર્ષે ટેરિફમાં વધુ 30 ટકા વૃદ્ધિનો અંદાજ છે.”

એકાદ મહિના પહેલાં ભારતી એરટેલ, વોડાફોન આઇડિયા અને રિલાયન્સ જિયોએ ત્રણ વર્ષમાં પહેલી વખત બંડલ્ડ પ્રિ-પેઇડ ટેરિફમાં લગભગ 14-33 ટકા વધારો કર્યો હતો. તેને લીધે માસિક ARPUs હાલના ₹120થી વધીને ₹160 થવાનો અંદાજ છે.

જોકે, વોડાફોન આઇડિયાના અસ્તિત્વ સામે પ્રશ્નાર્થ હોવાથી કંપની બંધ થશે તો ટેરિફમાં ઝડપી વૃદ્ધિ નોંધાશે. એરટેલ, જિયો અને વોડાફોન આઇડિયાના પ્રતિનિધિ સેલ્યુલર ઓપરેટર્સ એસોસિયેશન ઓફ ઇન્ડિયાના ડિરેક્ટર જનરલ રાજન મેથ્યુસે જણાવ્યું હતું કે, “તાજેતરમાં (ડિસેમ્બર 2019) ટેરિફ વૃદ્ધિ પછી પણ ગ્રાહકો કોમ્યુનિકેશનની જરૂરિયાત માટે માથા દીઠ આવકના માત્ર 0.86 ટકા ચૂકવે છે, જે ચાર વર્ષ પહેલાંની તુલનામાં ઘણા ઓછા છે.”

એનાલિસ્ટ્સે જણાવ્યું હતું કે, ભારતમાં કોમ્યુનિકેશન્સ પર ગ્રાહકખર્ચ સિંગાપોર, મલેશિયા, ચીન, હોંગકોંગ, ફિલિપાઇન્સ, જાપાન, ઓસ્ટ્રેલિયા, અમેરિકા, ઇંગ્લેન્ડ, જર્મની અને ફ્રાન્સ કરતાં ઘણો ઓછો છે. જિયોની એન્ટ્રી પછી છેલ્લાં ત્રણ વર્ષમાં મોબાઇલ ઇન્ટરનેટનો વપરાશ નોંધપાત્ર વધ્યો છે ત્યારે ભસિનના જણાવ્યા અનુસાર મોબાઇલ યુઝર્સને પણ થોડો વધુ ભાવ ચૂકવવામાં વાંધો નહીં આવે.

કોટક ઇન્સ્ટિટ્યૂશનલ ઇક્વિટીઝે જણાવ્યું હતું કે, “જુલાઈ-સપ્ટેમ્બર 2019માં ગ્રાહકના સ્તરે વાર્ષિક ટેલિકોમ ખર્ચ ₹1.45 ટ્રિલિયન રહ્યો હતો, જે જૂન 2016ના સ્તરથી 21 ટકા નીચો છે. સૂચિત ગાળામાં ટેલિકોમ ઉદ્યોગનો વોઇસ ટ્રાફિક 2.1 ગણો અને ડેટા ટ્રાફિક 43 ગણો વધ્યો હતો.” નિષ્ણાતોના જણાવ્યા અનુસાર ટેલિકોમ ટેરિફમાં વૃદ્ધિના આગામી રાઉન્ડનો આધાર વોડાફોન આઇડિયાના અસ્તિત્વ પર રહેશે.