અપેક્ષાનુસાર રેપો રેટમાં 25 બેસિસ પોઈન્ટનો ઘટાડો

71436447મુંબઈ: દેશના અર્થતંત્રને મંદીમાંથી ઉગારવા ભારતીય રિઝર્વ બેન્કે આજે સતત પાંચમી વાર પોલિસી રેટમાં ઘટાડો કર્યો હતો. મધ્યસ્થ બેન્કે આજે અપેક્ષાનુસાર રેપો રેટમાં 25 બેસિસ પોઈન્ટ્સનો ઘટાડો કર્યો હતો.

RBI મોનેટરી પોલિસી કમિટી (MPC)ની ચાલુ નાણાકીય વર્ષની ચોથી સમીક્ષા બેઠકમાં રેપો રેટ અથવા ટૂંકા ગાળાના ધિરાણ દર 25 બેસિસ પોઈન્ટ ઘટાડીને 5.15 ટકા કરવામાં આવ્યા છે. આ અગાઉ રેપો રેટ 5.40 ટકા હતો.

આ સાથે હવે રિવર્સ રેપો રેટ 4.90 ટકા અને માર્જિનલ સ્ટેન્ડિંગ ફેસેલિટી (MSF) રેટ 5.40 ટકા થયો છે.જોકે, મધ્યસ્થ બેન્કે તેની સમીક્ષા બેઠકમાં ‘અેકોમોડેટિવ’ સ્ટાન્સ યથાવત જાળવી રાખ્યું હતું. RBIએ પોલિસી બેઠકમાં ચાલુ નાણાકીય વર્ષ માટેનો વૃદ્ધિદરનો અંદાજ 6.90 ટકાથી ઘટાડીને 6.1 ટકા કર્યો હતો.

RBIએ તેના નિવેદનમાં જણાવ્યું હતું કે, ફુગાવો હાલમાં અંકુશમાં છે અને તેથી આર્થિક વિકાસ દર વધારવા માટે જરૂર હશે ત્યાં સુધી બેન્ક અેકોમોડેટિવ સ્ટાન્સ જાળવી રાખશે.

રેપો રેટમાં ઘટાડાથી આગામી દિવાળીના તહેવારમાં કન્ઝ્યુમર સેક્ટરમાં માંગ વધવાની શક્યતા વધી છે. હવે બેન્ચમાર્ક સાથે લોન રેટ લીંક કરવામાં આવ્યો હોવાથી હોમ અને ઓટો લોન સહિતની લોન સસ્તી થશે.

RBIએ આમ સતત પાંચમી વાર રેટ કટ કરી કુલ 1.35 ટકાનો કાપ મૂક્યો છે. દેશનો આર્થિક વિકાસ દર જૂન ક્વાર્ટરમાં 5 ટકાના છ વર્ષના તળિયે આવી ગયો હોવાથી માંગ પર અસર પડી હતી.

ત્રણ દિવસની બેઠક બાદ મધ્યસ્થ બેન્કની RBIના ગવર્નર શક્તિકાંતા દાસના વડપણ હેઠળની મોનેટરી પોલિસી કમિટીના તમામ છ સભ્યોએ રેટ કટની તરફેણમાં મત આપ્યો હતો જેમા રવિન્દ્ર ધોળકિયાએ 0.40 ટકા રેટ કટની હિમાયત કરી હતી.

MPCએ સપ્ટેમ્બર ક્વાર્ટરનો ફુગાવાનો અંદાજ સુધારીને 3.6 ટકા કરવામાં આવ્યો હતો.