બજાજ ઓટોનો ચોખ્ખો નફો 25% વધ્યો: આવક 7.5% ઘટી

71733366 મુંબઈ:બજાજ ઓટોએ બીજા ક્વાર્ટરમાં 25 ટકા વૃદ્ધિ સાથે ₹1,402.4 કરોડનો ચોખ્ખો નફો કર્યો છે. જોકે, કંપનીની આવક 7.5 ટકા ઘટીને ₹7,707.3 કરોડ રહી છે. વાહન દીઠ સારા રિયલાઇઝેશન અને કોર્પોરેટ ટેક્સમાં ઘટાડાની સાનુકૂળ અસરને કારણે કંપનીએ નફામાં સારી વૃદ્ધિ દર્શાવી છે.

જુલાઈ-સપ્ટેમ્બર ક્વાર્ટરમાં કંપનીનો વ્યાજ, ટેક્સ, ઘસારા અને એમોર્ટાઇઝેશન પૂર્વેનો નફો ₹1,305 કરોડ થયો છે. સૂચિત ગાળામાં EBITDA માર્જિન એક ટકા ઘટીને 16.9 ટકાના સ્તરે રહ્યું છે. સ્થાનિક ઓટો ઉદ્યોગની હાલની ધીમી વૃદ્ધિને પગલે બજાજ ઓટોનું કુલ વેચાણ 6 ટકા ઘટીને 11.7 લાખ યુનિટ્સ થયું છે. જોકે, તેનું પ્રતિ યુનિટ રિયલાઇઝેશન 9.5 ટકા વધીને ₹65,671 રહ્યું છે. જેનું કારણ સાનુકૂળ પ્રોડક્ટ મિક્સ કહી શકાય.

બજાજ ઓટોના એક્ઝિક્યુટિવ ડિરેક્ટર રાકેશ શર્માએ જણાવ્યું હતું કે, “વૈશ્વિક બિઝનેસની મજબૂત કામગીરી અને ઊંચું માર્જિન ધરાવતા થ્રી-વ્હીલર્સનું સારું વેચાણ નોંધાયું છે. સારી પ્રોડક્ટ મિક્સની મદદથી અમને એકંદર પ્રતિ યુનિટ રિયલાઇઝેશન સુધારવામાં મદદ મળી છે.”

કંપનીએ જણાવ્યું હતું કે, “સપ્ટેમ્બર 2019થી આવકવેરાના કાયદામાં ફેરફારને પગલે કંપની ચાલુ નાણાકીય વર્ષથી આવકવેરાની ગણતરી 25.17 ટકાના સુધારેલા દરે કરવાનો ઇરાદો ધરાવે છે. આવું કરવાથી ચાલુ ક્વાર્ટરમાં ટેક્સની જોગવાઈમાં ઘટાડો નોંધાશે અને અગાઉના ક્વાર્ટરના ₹182.4 કરોડના ટેક્સ ખર્ચની એન્ટ્રી રિવર્સ કરવામાં આવશે. તેને લીધે કંપનીનો ચોખ્ખો નફો વધશે.”

શર્માએ કહ્યું હતું કે, “જુલાઈ અને ઓગસ્ટમાં વાહનોના વેચાણમાં નોંધાયેલો 10 ટકા કે વધુના ઘટાડાનો ટ્રેન્ડ ચાલુ મહિને બદલાઈ રહ્યો છે. BS-VI વાહનોનું વેચાણ શરૂ થયા પહેલાં ઓટો ઉદ્યોગ સુધારો દર્શાવશે તો અમે વાર્ષિક 50 લાખ વાહનના વેચાણનો લક્ષ્યાંક પૂરો કરવાની નજીક પહોંચીશું.” બજાજ ઓટો ઊંચા નિકાસ વોલ્યુમને કારણે સ્થાનિક બજારમાં ધીમી વૃદ્ધિની અસરને ભરપાઈ કરી શકી હતી. ઉલ્લેખનીય છે કે, બજાજ ઓટોના ટુ અને થ્રી-વ્હીલરના કુલ વેચાણમાં નિકાસનો હિસ્સો 46.4 ટકા છે.