40 મિડ-કેપ શેર્સમાં સોદો કરવો મોંઘો થશે

71832548 રાજેશ માસ્કરન્હસ

I am Gujarat

મુંબઈ:પહેલી નવેમ્બરથી આશરે 40 જેટલા મિડ-કેપ શેર્સમાં સોદો કરવો મોંઘો થશે. શેરબજારોએ ₹1,000 કરોડથી વધારે માર્કેટ કેપિટલાઇઝેશન ધરાવતી એવી કંપનીઓ માટેના માર્જિનને બમણા કરતાં વધારે વધારીને 35 ટકા કર્યા છે જેમાં પ્રમોટર્સે કુલ ઇક્વિટી કેપિટલમાં 25 ટકા કરતાં વધારે હોલ્ડિંગને ગીરવી મૂક્યા હોય.

આવા 40 શેર્સમાંથી સાત શેર – ડિશ ટીવી, જીએમઆર ઇન્ફ્રા, જિન્દાલ સ્ટીલ, ટોરેન્ટ પાવર, ટોરેન્ટ ફાર્મા, મેક્સ ફાઇનાન્શિયલ, અદાણી પોર્ટ – ફ્યુચર એન્ડ ઓપ્શન સેગમેન્ટમાં ટ્રેડ થઈ રહ્યા છે.

ઉદાહરણ તરીકે નેશનલ સ્ટોક એક્સ્ચેન્જ પ્રમાણે અદાણી પોર્ટ માટે હાલનું ઇક્વિટી માર્કેટ માર્જિન 13.21 ટકા છે જ્યારે ટોરેન્ટ ફાર્મામાં 12.52 ટકા માર્જિન છે. હવે નવું માર્જિન લઘુતમ 35 ટકા હશે.

જોકે, માર્જિનમાં વધારો નજીકના ભવિષ્યમાં કેટલાક ડઝન સ્ટોક્સ પર અસર કરી શકે પરંતુ લાંબા ગાળા પર જોઈએ તો રોકાણકારોને લાભ થશે તેમ બ્રોકર્સ જણાવે છે.
સેન્ટ્રમ બ્રોકિંગના સીઇઓ સંદીપ નાયકે જણાવ્યું હતું કે, “આ પગલું કદાચ કેટલાક સ્ટોક્સને અસર કરી શકે ખાસ કરીને એફ એન્ડ ઓ સેગમેન્ટમાં સામેલ સ્ટોક્સને ટૂંકા ગાળામાં અસર કરી શકે પરંતુ લાંબા ગાળામાં તે રોકાણકારોને ફાયદો કરશે કેમ કે કેપિટલ માર્કેટના નિયમનકાર તથા શેરબજારો સિસ્ટમમાં જોખમને ઘટાડવાના તેમના પ્રયાસના ભાગરૂપે શેર્સ પરની જોખમી બોલીને નિરુત્સાહ કરવા માંગે છે.”

અન્ય કેટલાક શેર્સ કે જેમને પણ અસર થશે તેમાં ફ્યુચર રિટેલ, એમ્ફેસિસ, ઇમામી, અદાણી ગ્રીન એનર્જી, જેએસડબલ્યુ એનર્જી, મેટ્રોપોલિસ હેલ્થકેર, ફ્યુચર કન્ઝ્યુમર, બજાજ કન્ઝ્યુમર કેરનો સમાવેશ થાય છે કેમ કે શેરબજારોએ પ્રમોટર્સના ઊંચા ગીરવી સ્તર સાથેના સ્ટોક્સમાં અસ્થિરતામાં ઘટાડો કરવાના ભાગરૂપે વધારાનાં દેખરેખનાં પગલાં લેવાનો નિર્ણય કર્યો છે.

પાછલા એક વર્ષમાં એવા ઘણા બનાવો બન્યા છે કે જેમાં એફ એન્ડ ઓ સેગમેન્ટમાં સ્ટોક્સમાં એકતરફી તીવ્ર દેખાવ નોંધાયો હતો. પાછલા વર્ષે 21 સપ્ટેમ્બરે દીવાન હાઉસિંગ ફાઇનાન્સનો શેર ઇન્ટ્રા-ડે 60 ટકા ગગડ્યો હતો.