સેન્સેક્સે પહેલીવાર 42,000ની સપાટી વટાવી, નિફ્ટી પણ નવી ટોચે

73289627 મુંબઈ: શેરબજારના બેન્ચમાર્ક BSE સેન્સેક્સે આજે પહેલીવાર 42,000ની મનોવૈજ્ઞાનિક સપાટી વટાવી હતી તેમજ નિફ્ટીએ પણ નવી ટોચ રચી હતી. અમેરિકા-ચીને ટ્રેડ ડીલના પ્રથમ તબક્કા પર હસ્તાક્ષર કરતાં વૈશ્વિક બજારોની સાથે ભારતીય શેરબજારમાં પણ પોઝિટિવ ચાલ જોવા મળી હતી.

આજે સવારે 42,009.94 પોઈન્ટ્સની નવી ઊંચી સપાટીને સ્પર્શ કર્યા બાદ 30 શેરોનો બનેલો સેન્સેક્સ 127.65 પોઈન્ટ્સ અથવા 0.30 ટકા વધીને 42,000.38 પોઈન્ટ્સની સપાટીએ ટ્રેડ થઈ રહ્યો હતો.

આવી જ રીતે નિફ્ટી પણ 12,377.80 પોઈન્ટ્સની સર્વોચ્ચ સપાટીને સ્પર્શ્યા બાદ 28.45 પોઈન્ટ્સ અથવા 0.23 ટકા વધીને 12,371.75 પોઈન્ટ્સની સપાટીએ ટ્રેડ થઈ રહ્યો હતો.

સન ફાર્મા આજે સવારે 1.30 ટકાની વૃદ્ધિ સાથે ટોપ ગેઈનર બની રહ્યો હતો. આ ઉપરાંત નેસલે ઈન્ડિયા, HUL, કોટક બેન્ક, અલ્ટ્રાટેક સિમેન્ટ્સ, બજાજ ઓટો અને ભારતી એરટેલ પણ વધીને ટ્રેડ થઈ રહ્યા હતા.

બીજી તરફ ઈન્ડસઈન્ડ બેન્ક, ટાટા સ્ટીલ, NTPC, ટાઈટન, મહિન્દ્રા એન્ડ મહિન્દ્રા, ટેક મહિન્દ્રા, ONGC અને એશિયન પેઈન્ટ્સ ઘટીને ટ્રેડ થઈ રહ્યા હતા.

બુધવારે અમેરિકા અને ચીન વચ્ચે પહેલા તબક્કાની ટ્રેડ ડીલ હસ્તાક્ષર કરવામાં આવતાં વિશ્વભરના રોકાણકારોએ રાહતનો શ્વાસ લીધો હતો વૈશ્વિક શેરબજારોમાં પણ તેજી જોવા મળી હતી.

આજે સવારે ટોકિયો અને સિઓલ શેરબજાર વધીને ટ્રેડ થઈ રહ્યા હતા જ્યારે શાંઘાઈ અને હોંગકોંગના બજારો ફ્લેટ રહ્યા હતા.

બુધવારે વોલસ્ટ્રીટ બેન્ચમાર્ક નવી ટોચે બંધ રહ્યો હતો. બ્રેન્ટ ક્રૂડ વાયદો પણ 0.61 ટકા વધીને બેરલદીઠ 64.39 થયું હતું. દરમિયાન રૂપિયો પણ ડોલર સામે 5 પૈસાના સુધારા સાથે 70.77ની સપાટીએ ટ્રેડ થઈ રહ્યો હતો.