ઓઇલ ઇન્ડિયાને ₹48,000 કરોડ ચૂકવવા DoTની નોટિસ

73467851 નવી દિલ્હી:ટેલિકોમ વિભાગે અગાઉનાં લેણાં માટે ઓઇલ ઇન્ડિયાને ₹48,000 કરોડની નોટિસ ફટકારી છે. જોકે, દેશની બીજી સૌથી મોટી ઓઇલ ઉત્પાદક ટેલિકોમ વિભાગના નિર્ણયને ટેલિકોમ ડિસ્પ્યુટ્સ સેટલમેન્ટ એન્ડ એપેલટ ટ્રિબ્યુનલ (TDSAT)માં પડકારવાની યોજના ધરાવે છે.

સરકારનાં લેણાંમાં ટેલિકોમ સિવાયની આવકને સામેલ કરવાના સુપ્રીમ કોર્ટના આદેશને કારણે ડિપાર્ટમેન્ટ ઓફ ટેલિકમ્યુનિકેશન્સ (DoT) ઓઇલ ઇન્ડિયાને આંતરિક કોમ્યુનિકેશન માટે ઓપ્ટિક ફાઇબર નેટવર્કના વપરાશના વ્યાજ અને પેનલ્ટી માટે સૈદ્ધાંતિક રીતે ₹48,000 કરોડ ચૂકવવા જણાવ્યું છે. DoT દ્વારા કરાયેલાં લેણાંની માંગણી ઓઇલ ઇન્ડિયાની નેટવર્થ કરતાં બમણી છે.

ઓઇલ ઇન્ડિયાના ચેરમેન અને એમડી સુશીલ ચંદ્ર મિશ્રાએ જણાવ્યું હતું કે, “અમને 23 જાન્યુઆરી સુધીમાં નાણાંની ચુકવણી માટે નોટિસ મળી છે. અમે તેને TDSATમાં પડકારવાની યોજના ધરાવીએ છીએ.” ઉલ્લેખનીય છે કે, ઓઇલ ઇન્ડિયા ગેઇલ પછી બીજી સૌથી મોટી ઓઇલ-ગેસ કંપની છે. ગેઇલ પાસે DoTએ ₹1.72 લાખ કરોડની માંગણી કરી છે. મિશ્રાએ જણાવ્યું હતું કે, DoT સાથે તેમની કંપનીના કરાર અનુસાર વિવાદની સ્થિતિમાં TDSATમાં અરજીની જોગવાઈ છે. એટલે કંપની ટ્રિબ્યુનલમાં જવા સક્રિય છે.

સુપ્રીમ કોર્ટના 24 ઓક્ટોબરના આદેશને પગલે સરકાર દ્વારા ફાળવાયેલા સ્પેક્ટ્રમનો ઉપયોગ કરીને થયેલી ટેલિકોમ સિવાયની આવકને કાનૂની લેણાંની ગણતરી કરતી વખતે ધ્યાનમાં લેવા જરૂરી છે. DoTએ ઓઇલ ઇન્ડિયાની છેલ્લાં 15 વર્ષની કમાણીનો સરવાળો કરી રકમની માંગણી કરી છે.

સૂત્રોના જણાવ્યા અનુસાર ઓઇલ ઇન્ડિયા જેવી કંપનીઓ ઉત્પાદિત ઓઇલ-ગેસ પર સરકારને ઓઇલ ડેવલપમેન્ટ ફી, એક્સાઇઝ ડ્યૂટી, નફો સહિતની રકમ ચૂકવે છે. આવી કંપનીઓ આવક મેળવવા સરકાર સિવાયના પક્ષકારોને બેન્ડવિડ્થનું વેચાણ કરતી નથી. તેમણે જણાવ્યું હતું કે, “ઓપ્ટિક ફાઇબરનો ઉપયોગ માત્ર આંતરિક કોમ્યુનિકેશન માટે કરાય છે.”

ટેલિકોમ કંપનીઓ દ્વારા AGR મુદ્દે સુપ્રીમ કોર્ટને કરાયેલી અરજીમાં ઓઇલ ઇન્ડિયા પક્ષકાર ન હતી. એટલે તેને સર્વોચ્ચ અદાલત દ્વારા કોઈ આદેશ અપાયો ન હતો. તેને લીધે કંપની સુપ્રીમ કોર્ટમાં અરજી નહીં કરે. ઉલ્લેખનીય છે કે, ગેઇલ પાસે DoTએ ₹1,72,655 કરોડની માંગણી કરી છે. તેના જવાબમાં ગેઇલે જણાવ્યું છે કે, તેણે જે રકમ સરકારને ચૂકવી છે તેનાથી વધુ કોઈ લેણું બાકી રહેતું નથી. સૂત્રોના જણાવ્યા અનુસાર ગેઇલ પાસે માંગવામાં આવેલી રકમ કંપનીની નેટવર્થ કરતાં ત્રણ ગણાથી વધુ છે.

અહીં એ બાબત નોંધવી જરૂરી છે કે, ભારતી એરટેલ અને વોડાફોન આઇડિયાને સરકારના લાઇસન્સ અને સ્પેક્ટ્રમનો ઉપયોગ દ્વારા નોન-ટેલિકોમ આવક મળી હોવાની શક્યતા છે. જોકે, ગેઇલ અને ઓઇલ ઇન્ડિયા જેવી કંપનીઓને આવી કોઈ આવક મળી નથી. DoTએ તમામ ટેલિકોમ કંપની પાસે અગાઉના કાનૂની લેણાં પેટે ₹1.47 લાખ કરોડની માંગણી કરી છે.