5G માટે એરટેલે હુઆવીની તરફેણ કરી

71438395નવી દિલ્હી:5G-હુઆવીનો વિવાદ પહેલેથી ગૂંચવાયેલો છે ત્યારે છેલ્લા બે દિવસમાં તેમાં બે મોટા વળાંક આવ્યા છે. ગુરુવારે ભારતી એન્ટરપ્રાઇઝિસના ચેરમેન અને ટેલિકોમ ઉદ્યોગના અગ્રણી સુનિલ મિત્તલે અમેરિકન વાણિજ્ય મંત્રી વિલ્બર રોસના સૂચનને ફગાવી દીધું હતું. તેમણે કહ્યું હતું કે ભારતે હુઆવીના 5G નેટવર્કને વિકસાવવા માટે વિચારવું જોઈએ. એક દિવસ અગાઉ જ વિદેશમંત્રી એસ જયશંકરે જણાવ્યું હતું કે 5G એ ટેલિકોમનો મુદ્દો છે, રાજકીય નહીં. તેથી ભારત અને ચીન વચ્ચેની વાતચીતમાં તે દ્વિપક્ષીય વલણ અપનાવશે.

મિત્તલ અને રોસે નવી દિલ્હી ખાતે વર્લ્ડ ઇકોનોમિક ફોરમમાં પોતપોતાની વાત રજૂ કરી હતી. જયશંકરે વોશિંગ્ટન ખાતે હેરિટેજ ફાઉન્ડેશનમાં આ વાત કરી હતી.
ડબલ્યુઇએફ ખાતે વક્તવ્ય આપતાં રોસે કહ્યું કે હુઆવીના 5G ગિયર અંગે વાસ્તવિક સુરક્ષાની ચિંતા છે. અમેરિકન વાણિજ્ય મંત્રીએ કહ્યું હતું કે 5Gના કોર અને પેરિફેરલ ઇન્ફ્રાસ્ટ્રક્ચર અલગ નથી. તેથી બેકડોર દ્વારા સમગ્ર સિસ્ટમમાં પ્રવેશી શકાય છે. જ્યારે થ્રીજી અને 4જી ટેક્‌નોલોજીમાં આવું નથી.

પરંતુ મિત્તલે કહ્યું કે ચાઇનીઝ ગિયર ઉત્પાદક હુઆવીની ટેક્‌નોલોજી તેની યુરોપિયન હરીફો કરતાં વધુ ચઢિયાતી છે. તેમણે કહ્યું કે હુઆવીએ લેટેસ્ટ ટેક્‌નોલોજી વિકસાવવામાં ભારે પ્રગતિ કરી છે. મારા મતે ભારતે તેમનો (હુઆવી)નો ઉપયોગ કરવો જોઈએ.

જયશંકરે બુધવારે વોશિંગ્ટનમાં વક્તવ્ય આપતાં કહ્યું કે ચીન સાથે ઘણા દેશોને જુદા જુદા વાંધા છે. તે વિશે હું એટલું જ કહીશ કે દ્વિપક્ષીય વલણથી તેનો ઉકેલ લાવી શકાય છે. ભારતની 5G અંગેની પોઝિશન પ્રમાણે અમે તેને રાજકીય મુદ્દો ગણતા નથી. 5G એ ટેલિકોમનો ઇશ્યૂ છે. અમે યોગ્ય સમયે જે નિર્ણય લેવાનો હોય તે લઈશું.

ડબલ્યુઇએફ ખાતે વાત કરતા મિત્તલે પશ્ચિમી દેશોની ટેક્‌નોલોજી સાથે તુલના કરી હતી. તેમણે કહ્યું કે બહુ ઓછું લિવરેજ ધરાવતી હોય તેવી કંપનીઓ માટે સેક્ટર ખોલવાના બદલે અમે હુઆવી જેવી કંપનીઓ પસંદ કરીશું કારણ કે મહત્ત્વની યોજના છે.

આ દર્શાવે છે કે ભારતીય ટેલિકોમ કંપની અને ડોનાલ્ડ ટ્રમ્પ સરકારના મંત્રી 5G અંગે અલગ મત ધરાવે છે. અમેરિકન સરકારે કહ્યું હતું કે જેટલી વખત સિસ્ટમ અથવા નેટવર્ક વેન્ડર સાથે ઇન્ટરેક્શન થશે તેટલી વખત સુરક્ષાનો મુદ્દો પેદા થશે. મિત્તલે કહ્યું કે અમેરિકાના દબાણ બાદ હુઆવી હવે વધારે ખુલ્લી કંપની છે. ચાઇનીઝ કંપનીએ હવે પોતાની ટેક્‌નોલોજી ખુલ્લી કરી છે અને અમેરિકન કંપનીઓને તે ટેક્‌નોલોજી પૂરી પાડે છે. તે ટીસીએસ અને વિપ્રો જેવી ભારતીય કંપનીઓ માટે પણ ખુલ્લી થઈ શકે છે.