ભારતમાં છેલ્લાં 8 વર્ષમાં વેતન વૃદ્ધિ માત્ર 0.2 %

૨૦૦૮માં વૈશ્વિક સ્તરે ફરી વળેલી મંદીથી અત્યાર સુધીના આઠ વર્ષમાં ભારતીય કર્મચારીઓના વેતનમાં માત્ર ૦.૨ ટકાનો સાવ નહીંવત્ કહી શકાય તેવો વધારો થયો છે. જ્યારે ચીનમાં સૌથી વધુ ૧૦.૬ ટકાની વેતન વૃદ્ધિ જોવાઈ હોવાનું એક અહેવાલમાં જણાવાયું છે. અહેવાલ અનુસાર ભારતમાં વેતન વૃદ્ધિ સૌથી અસમાન છે.
કોર્ન ફેરીના એકમ હેય ગ્રૂપ દ્વારા કરાયેલા એક વિશ્લેષણ અનુસાર ભારતમાં સમીક્ષાના સમયગાળા દરમિયાન ૦.૨ ટકા વેતન વૃદ્ધિ જોવાઈ છે, જ્યારે જીડીપીમાં ૬૩.૮ ટકાની વૃદ્ધિ નોંધાઈ છે. સમીક્ષાના સમયગાળા દરમિયાન ચીન, ઈન્ડોનેશિયા તથા મેક્સિકોમાં વેતનમાં અનુક્રમે સૌથી વધુ ૧૦,૬ ટકા, ૯.૩ ટકા તથા ૮.૯ ટકાની વૃદ્ધિ જોવાઈ હતી. જ્યારે તુર્કી (-૩૪.૪ ટકા), આર્જેન્ટિના(-૧૮.૬ ટકા), રશિયા(-૧૭.૧ ટકા) તથા બ્રાઝિલ(-૧૫.૩ ટકા) જેવા કેટલાંક ઉભરતાં રાષ્ટ્રોમાં વેતન વૃદ્ધિ સૌથી નિમ્નસ્તરે જોવાઈ હતી. અહેવાલમાં જણાવ્યાં અનુસાર મોટાભાગના ઉભરતાં જી20 દેશો વિશ્લેષણની આ યાદીમાં ક્યાં તો ઊંચી વૃદ્ધિ ધરાવે છે ક્યાં તો સૌથી નીચી વૃદ્ધિ ધરાવે છે, જ્યારે ભારત તેમાં મધ્ય ક્રમે છે.
કોર્ન ફેરી હેય ગ્રૂપના બેન્જામિન ફ્રોસ્ટના જણાવ્યાં અનુસાર અમે જેટલાં રાષ્ટ્રોનો અભ્યાસ કર્યો છે તેમાં ભારતમાં વેતન વૃદ્ધિ સૌથી અસમાન હોવાનું જણાયું છે. ઊંચા હોદ્દા પર મજબૂત વેતન વૃદ્ધિ થવાનું કારણ મહત્વના વ્યવસાયો તથા સંચાલકીય ભૂમિકા માટે પ્રતિભાશાળી લોકોની અછત કારણભૂત છે. ભારતમાં મહત્વના હોદ્દાઓ પર અપાતા વેતનનું પ્રમાણ વિશ્વના મોટાભાગના દેશો કરતાં નીચું છે.