છેલ્લા 8 મહિનાના આકર્ષક IPOs 75% સુધી ગબડ્યા

65992637 નવી દિલ્હી:ચાલુ વર્ષે બીએસઇ પર લિસ્ટ થયેલા દર ત્રણમાંથી બે શેર હાલના કરેક્શનમાં લિસ્ટિંગ ભાવથી 73 ટકા ગબડ્યા છે. 2018માં સબસ્ક્રિપ્શનની રીતે ત્રણ સૌથી મોટા ઇશ્યૂ એપોલો માઈક્રો સિસ્ટમ્સ, અંબર એન્ટરપ્રાઇઝિસ અને HDFC AMC પણ બજારના ઘટાડા સામે ટકી શક્યા નથી.

કેટલાક IPOsમાં લિસ્ટિંગ પછી પ્રોફિટ-બૂકિંગ જોવા મળ્યું છે, તો કેટલાક પબ્લિક ઇશ્યૂમાં રોકાણકારોએ બજારના ઘટાડાને કારણે વેચવાલી કરી છે. ચાલુ વર્ષે સબસ્ક્રિપ્શનની રીતે સૌથી મોટા IPO એપોલો માઈક્રો સિસ્ટમ્સને ઇશ્યૂ સાઇઝથી 249.64 ગણી બિડ મળી હતી, પણ શેર ₹478ના લિસ્ટિંગ ભાવથી 73 ટકા ગબડ્યો છે.

ઉલ્લેખનીય છે કે, શેર ઇશ્યૂ પ્રાઇસની તુલનામાં 74 ટકા પ્રીમિયમે લિસ્ટ થયો હતો. જાન્યુઆરીમાં મૂડીબજારમાં આવેલા અંબર એન્ટરપ્રાઇઝિસના IPOને 167 ગણું સબસ્ક્રિપ્શન મળ્યું હતું અને તેમાં રોકાણકારોને 36.76 ટકાનો આકર્ષક લિસ્ટિંગ નફો મળ્યો હતો.

જોકે, બુધવારના બંધ ભાવને આધારે શેર ₹1,180ના લિસ્ટિંગ ભાવની તુલનામાં 21 ટકા ઘટ્યો છે. HDFC AMCનો મેગા IPO 100 ગણો ભરાયો હતો અને તેમાં રોકાણકારોને 58 ટકા લિસ્ટિંગ નફો મળ્યો હતો. જોકે, અત્યારે શેર લિસ્ટિંગ ભાવથી 18 ટકા નીચે ટ્રેડ થઈ રહ્યો છે.

પ્રાઇમ ડેટાબેઝના આંકડા મુજબ ચાલુ વર્ષે આવેલા IPOમાંથી માત્ર 50 ટકા શેર લિસ્ટિંગના એક સપ્તાહ પછી લિસ્ટિંગ પ્રાઇસની ઉપર રહી શક્યતા છે. જેમાંથી લગભગ 67 ટકા શેર લિસ્ટિંગના છ મહિનાની અંદર લિસ્ટિંગ પ્રાઇસની નીચે સરક્યા છે. ઇન્ડોસ્ટાર કેપિટલ ફાઇનાન્સ (41 ટકા નીચે), ટેસ્ટી ડેરી (39 ટકા), ICICI સિક્યોરિટીઝ (30 ટકા) અને ક્રેડિટએક્સિસ ગ્રામીણ (22 ટકા) લિસ્ટિંગ ભાવની નીચે ટ્રેડ થઈ રહ્યા છે.

ગેલેક્સી સર્ફેક્ટન્ટ, ભારત ડાયનેમિક્સ, HG ઇન્ફ્રા એન્જિનિયરિંગ, એસ્ટર DH હેલ્થકેર અને સંધાર ટેક જેવા કેટલાક શેર લિસ્ટિંગ ભાવથી ઓછામાં ઓછા 10 ટકા ઘટ્યા છે. શેરબજારના સેન્ટિમેન્ટમાં અચાનક ઘટાડા તરફી પલટાને કારણે અત્યારે ચાલી રહેલા બે IPOના સબસ્ક્રિપ્શનમાં મુશ્કેલી ઊભી થઈ છે.

ગાર્ડન રિચ શિપબિલ્ડર્સનો IPO આખરી દિવસે માત્ર 4 ટકા ભરાયો હતો. તેને લીધે કંપનીને ઇશ્યૂ લંબાવવાની અને IPOની પ્રાઇસ બેન્ડમાં ઘટાડો કરવાની ફરજ પડી હતી. આવાસ ફાઇનાન્શિયર્સનો IPO પણ છેલ્લા દિવસે આ લખાય છે ત્યાં સુધી પૂરો ભરાયો ન હતો. બજારમાં મોટા કરેક્શનને કારણે કંપનીઓ નવા IPOની અરજી માટે ખચકાટ અનુભવી રહી છે.
]]>