AC, ફ્રીજ, વોશિંગ મશીન સહિતની 19 ચીજો પર કસ્ટમ્સ ડ્યૂટી વધી

65974919 નવી દિલ્હી:સરકારે બુધવારે એસી, રેફ્રિજરેટર, વોશિંગ મશીન સહિતની 19 ચીજો પર મધરાતથી અમલી બને તે રીતે કસ્ટમ્સ ડ્યૂટી લાદતાં તેનો ભાવ વધશે. આ ચીજો પર ડ્યૂટી 10 ટકાથી બમણી કરીને 20 ટકા કરવામાં આવી છે.

ગયા નાણાકીય વર્ષમાં આ ચીજોની આયાતનું બિલ ₹86,000 કરોડ હતું એમ નાણામંત્રાલયે એક નિવેદનમાં જણાવ્યું હતું. આ યાદીમાં સમાવિષ્ટ અન્ય ચીજોમાં વોશિંગ મશીન, સ્પીકર્સ, રેડિયલ કાર ટાયર, જ્વેલરી, કિચન અને ટેબલવેર, પ્લાસ્ટિક ગૂડ્ઝ અને સુટકેસનો સમાવેશ થાય છે. એસી, રેફ્રિજરેટર્સ અને વોશિંગ મશીન્સ (10 કિલોથી ઓછા) પરની ઇમ્પોર્ટ ડ્યૂટી બમણી કરીને 20 ટકા કરવામાં આવી છે.

એસી અને ફ્રીજના કોમ્પ્રેસર પરની ડ્યૂટી 7.5 ટકાથી વધારીને 10 ટકા, સ્પીકર, રેડિયલ કાર ટાયર, બાથ, શોઅર બાથ, સિન્ક, વોશ બેસિન, ટેબલવેર, કિચનવેર અને પ્લાસ્ટિક્સની ઘરગથ્થુ ચીજો, ટ્રન્ક્સ સુટકેસ, એક્ઝિક્યુટિવ કેસિસ, બ્રીફ કેસિસ, ટ્રાવેલ બેગ્સ પર 10 ટકાથી વધારીને 15 ટકા, નોન ઇન્ડસ્ટ્રિયલ ડાયમન્ડ (રફ ડાયમન્ડ સિવાય) એટલે કે કટ અને પોલિશ્ડ ડાયમન્ડ્સ, લેબમાં બનાવેલી ડાયમન્ડ, સેમિ-પ્રોસેસ્ડ ડાયમન્ડ, કટ અને પોલિશ્ડ કલર્ડ જેમસ્ટોન પર પાંચ ટકાથી વધારીને 7.5 ટકા અને ફૂટવેર પરની ડ્યૂટી 20 ટકાથી વધારીને 25 ટકા કરવામાં આવી છે.

મંત્રાલયે જણાવ્યું હતું કે, કેન્દ્ર સરકારે કેટલીક આયાતી ચીજો પરની બેઝિક કસ્ટમ્સ ડ્યૂટીમાં વધારો કરીને ટેરિફ પગલાં લીધાં છે. આ પગલાં પાછળનો હેતુ ચાલુ ખાતાની ખાધ (CAD) પર કાપ મૂકવાનો છે. બેઝિક કસ્ટમ્સ ડ્યૂટીના આ નવા દર 26 સપ્ટેમ્બરની મધરાતથી અમલી બનશે.

બિનઆવશ્યક ચીજોની આયાત પર નિયંત્રણ લાદવાનો નિર્ણય ચાલુ ખાતાની ખાધ અને મૂડીપ્રવાહને અંકુશમાં લેવાની સરકારની યોજનાનો ભાગ છે. એપ્રિલથી જૂન ક્વાર્ટરમાં ચાલુ ખાતાની ખાધ વધીને જીડીપીના 2.4 ટકા થઈ હતી.
]]>