જીઓ ઈફેક્ટ: એરટેલનો ચોખ્ખો નફો 75% ગબડ્યો

નવી દિલ્હી:જીઓની આક્રમક ઓફર્સથી પરેશાન ભારતી એરટેલનો ચોખ્ખો નફો 74.89 ટકા ઘટીને રૂ.367 કરોડ થયો છે. અગાઉના વર્ષના સમાન ગાળામાં કંપનીનો ચોખ્ખો નફો રૂ.1,462 કરોડ હતો.

એરટેલની કુલ આવક 14 ટકા ઘટીને રૂ.21,958 કરોડ થઈ છે, જે અગાઉના વર્ષના સમાન ગાળામાં રૂ.25,546 કરોડ હતી. જોકે, જાન્યુઆરી-માર્ચ ક્વાર્ટરની તુલનામાં ભારતી એરટેલનો એપ્રિલ-જૂન ક્વાર્ટરનો નફો સાધારણ ઘટીને રૂ.373.4 કરોડ થયો છે.

ભારતી એરટેલે બજાર બંધ થયા પછી પરિણામ જાહેર કર્યું હતું. કંપનીના એમડી અને સીઇઓ ગોપાલ વિટ્ટલ (ભારત અને સાઉથ એશિયા) એ જણાવ્યું હતું કે, નવી કંપનીની એન્ટ્રીથી ભારતના ટેલિકોમ માર્કેટના ભાવમાં મોટી ઊથલપાથલ થઈ છે. વાર્ષિક ધોરણે કંપનીની આવકમાં 15 ટકા ઘટાડો નોંધાયો છે.

જેને લીધે સેક્ટરની નફાકારકતા, કેશ-ફ્લો અને ઋણબોજ પર દબાણ વધ્યું છે. જોકે, સપ્ટેમ્બર 2016માં જીઓની એન્ટ્રી પછી જાન્યુઆરી-માર્ચ 2017 ક્વાર્ટરની તુલનામાં એરટેલ તેની અસર પર નિયંત્રણ મેળવવામાં સફળ રહી છે. ઉલ્લેખનીય છે કે, એપ્રિલ-જૂનનો ગાળો જીઓએ પેઇડ સર્વિસિસ શરૂ કર્યા પછીનો પહેલો ક્વાર્ટર છે.