હસ્તાંતરણ સોદામાં ઓગસ્ટમાં ત્રણ ગણો ઊછાળો જોવાયો

કોર્પોરેટ ઇન્ડિયા દ્વારા હસ્તાંતરણના સોદામા ઓગસ્ટ મહિનામાં નોંધપાત્ર વૃધ્ધિ જોવાઈ હતી. ઓગસ્ટ મહિનામાં ગત્ વર્ષના સમાન ગાળાની સરખામણીએ ત્રણ ગણી વૃધ્ધિ થઈને ૨.૫ અબજ ડોલરના કામકાજ થયા હતા. માઇક્રો સ્તરે સકારાત્મક પ્રવાહની અસરને કારણે મર્જર અને એક્વેઝેશનના કામકાજ વધ્યા હોવાનું ગ્રાન્ટ થોરન્ટોના રિપોર્ટમાં જણાવાયું છે.
ઓગસ્ટ મહિનામાં મોટા સોદાની સંખ્યા વધતાં તેની અસર જોવાઈ છે એવો ઉલ્લેખ કરીને રિપોર્ટમા જણાવાયું છે કે બેન્કિંગ અને ફાઇનાન્સિયલ ક્ષેત્રમાં થયેલા સોદાનો હિસ્સો ૩૦ ટકાનો રહ્યો હતો જે મુખ્યત્વે એચડીએફસી લાઇફની સાથે મેક્સ લાઇફનું મર્જર કરવાને કારણે રહ્યો હતો, જેનું માર્કેટ વેલ્યૂ ૧૦ અબજ ડોલરની હતી. આ ઉપરાંત ટેલિકોમ, એગ્રિકલ્ચર અને ફોરેસ્ટ્રી, ફાર્મા અને મેન્યુફેકચરિંગ ક્ષેત્રે ૧૦ કરોડ ડોલરના સોદા થયા હતા.

જાન્યુઆરીથી ઓગસ્ટ ૨૦૧૬ના ગાળામાં સ્થાનિક અને બાંહ્ય મળીને કુલ ૨૨ અબજ ડોલરના ૩૦૦ એમ એન્ડ એ સોદાઓ થયા હતા. કંપનીના પાર્ટનર પ્રશાંત મહેરાએ જણાવ્યું હતું કે, માઇક્રો ફંન્ડામેન્ટલમાં થઈ રહેલા બદલાવની અસર આ સોદા પર જોવાઈ હતી. ફુગાવો અંકુશમાં રહેવો, જીડીપી ગ્રોથ સ્થિરથી સુધરવો, એફડીઆઈ પ્રવાહ સકારાત્મક રહેવો જેવા કારણોની સારી અસર રહી છે. વધુમાં સરકારે બેન્કિંગ, ઇન્ફ્રાસ્ટ્રકચર અને જીએસટીને અમલ કરવાની દિશામાં રિફોર્મ હાથ ધર્યા છે. આ બધા કારણોની પણ પોઝિટીવ અસર જોવાઈ છે.

મહેરાના જણાવ્યા અનુસાર, બીએફએસઆઈ, ટેલિકોમ, એગ્રી, ફાર્મા અને મેન્યુફેકચરિંગ ક્ષેત્રની આસપાસ જ મોટા સોદા થયા છે અને કુલ સોદામાં ૯૦ ટકાનો હિસ્સો ધરાવે છે. તેમનું માનવું હતું કે આગામી સમયમાં કોન્સોલિડેશનની સ્થિતિ વધશે અને તેને જોતાં ઇન્ફ્રાલસ્ટ્રકચર તેમજ મેન્યુફેકચરિંગ ક્ષેત્રે એમ એન્ડ એ સોદામાં વૃધ્ધિ જોવાશે. ગ્રામ્ય સ્તરે અને સાતમાં પગાર પંચની ભલામણોને કારણે માગ વધવાની આશા તેમણે વ્યકત કરી હતી.