યસ બેન્ક મુશ્કેલીમાં છતાં રિટેલ રોકાણકારો વધ્યા

71645760 રાજેશ માસ્કરન્હસ

I am Gujarat

મુંબઈ:છેલ્લા 12 મહિનામાં લગભગ 7.56 લાખ રિટેલ રોકાણકારોએ યસ બેન્કના શેર ખરીદ્યા છે, જ્યારે છેલ્લા ત્રણ મહિનામાં 2.6 લાખ રોકાણકારોએ આ કંપનીના શેર ખરીદ્યા છે. રાણા કપૂર દ્વારા પ્રમોટ કરાયેલી બેન્કમાં સંકટના સંકેત હોવા છતાં નાના રોકાણકારો તેના શેર ખરીદી રહ્યા છે.

હાલની સ્થિતિમાં રોકાણકારોએ બેન્કમાં ટર્નઅરાઉન્ડની આશાએ શેર ખરીદ્યા છે. તેથી યસ બેન્કમાં રિટેલ રોકાણકારોના સંખ્યા 13.80લાખને વટાવી ગઈ છે. લાર્સન એન્ડ ટુબ્રો, ઇન્ફોસિસ, આઇટીસી, આઇસીઆઇસીઆઇ બેન્ક, ટીસીએસ, એચડીએફસી અને બીજી ઘણી બ્લૂ ચિપ કંપનીઓ કરતા યસ બેન્કના રિટેલ રોકાણકારોની સંખ્યા મોટી છે.

હાલમાં યસ બેન્ક એ રિટેલ શેરહોલ્ડર્સની સંખ્યાની રીતે જોતાં પાંચમા ક્રમનો સૌથી મોટો શેર છે. અનિલ અંબાણીની રિલાયન્સ પાવરે 2008માં આઇપીઓ વખતે રેકોર્ડ રચ્યો હતો જેમાં 7 લાખ કરોડની બિડ મળી હતી. તે સમયે 30.81 લાખ શેરધારકો આ શેર ધરાવતા હતા. રિલાયન્સ ઇન્ડસ્ટ્રીઝ, સ્ટેટ બેન્ક ઓફ ઇન્ડિયા અને રિલાયન્સ કોમ્યુનિકેશન્સ અને બીજી ત્રણ કંપનીઓ એવી છે જે યસ બેન્ક કરતાં વધારે રિટેલ રોકાણકારો ધરાવે છે.

મોટા ભાગના એનાલિસ્ટ્સ માને છે કે યસ બેન્કનો શેર નજીકના ગાળામાં અંડરપરફોર્મ કરી શકે છે કારણ કે તેના વિશે પુષ્કળ પ્રમાણમાં અનિશ્ચિતતા પ્રવર્તે છે અને તેમાં જોખમ લેવા જેવું નથી.

જેપી મોર્ગનના એનાલિસ્ટ સૌરભ કુમારે જણાવ્યું કે, “અમે યસ બેન્કને અંડરવેઇટ તરીકે રેટિંગ આપીએ છીએ કારણ કે અમને લાગે છે કે બેન્ક માટે અર્નિંગ નોર્મલ થવાની શરૂઆત નાણાકીય વર્ષ 2022માં થશે અને વૃદ્ધિને આંચકો લાગશે સિવાય કે ઇક્વિટી એકત્ર કરવાનો મુદ્દો ઉકેલાય નહીં. મિડ કોર્પોરેટ સેક્ટરમાં સ્ટ્રેસ અને તેમાં યસ બેન્કના એક્સ્પોઝર મધ્યમ ગાળામાં વેલ્યુએશન પર દબાણ પેદા કરવાનું ચાલુ રાખશે.”

આ શેર તેની ₹404ની ટોચ પરથી 88 ટકા ઘટ્યો હતો. ઓગસ્ટ 2018માં તેણે આ સપાટી નોંધાવી હતી. ત્યાર બાદ તે 15.19 ટકા વધ્યો છે અને ગુરુવારે ₹47.40બંધ રહ્યો હતો. સમીક્ષા હેઠળના ક્વાર્ટર દરમિયાન રિટેલ રોકાણકારોએ યસ બેન્કના 26.40કરોડ શેર્સ ખરીદ્યા છે જ્યારે હાઈ નેટવર્થ રોકાણકારોએ 2.53 કરોડ શેરની ખરીદી છે. સંયુક્ત રીતે તેમણે પસાર થયેલા ક્વાર્ટરમાં લગભગ 29 કરોડ શેરની ખરીદી કરી છે.

વિદેશી પોર્ટફોલિયો રોકાણકારોએ સપ્ટેમ્બર ક્વાર્ટરમાં તેમનો હિસ્સો 33.69 ટકાથી ઘટાડીને 26.51 ટકા કર્યો હતો. મ્યુચ્યુઅલ ફંડ હાઉસિસે સપ્ટેમ્બર ક્વાર્ટરમાં તેમનું હોલ્ડિંગ 6.59 ટકાથી વધારીને 9.26 ટકા કર્યું હતું. આગામી બેથી ત્રણ વર્ષમાં બેન્કને તેની બજારમૂડી જેટલી રકમની જરૂર પડશે. એનાલિસ્ટ્સને બેન્કની ફંડ એકત્ર કરવાની ક્ષમતા અંગે ચિંતા છે.

મેક્વેરી કેપિટલ સિક્યોરિટીઝના એનાલિસ્ટ સુરેશ ગણપથી કહે છે કે, “યસ બેન્ક આટલી મૂડી એકત્ર કરી શકશે કે નહીં તે વિશે અમને ખાતરી નથી. આ એકત્રીકરણ બૂક વેલ્યૂથી નીચા દરે થશે તેથી માઇનોરિટી શેરધારકોને નુકસાન થશે.”