જિઓ ઈફેક્ટ: એરટેલની રૂ.૧૪૯૫માં ૯૦ દિવસ ફ્રી ડેટાની જાહેરાત

રિલાયન્સ જિઓએ તેના ગ્રાહકોને ૩૧ ડિસેમ્બર સુધી ફ્રી ડેટા ઉપલબ્ધ બનાવવાની કરેલી જાહેરાતથી દેશના ટેલિકોમ ક્ષેત્રે શરૂ થયેલી ગળાકાપ સ્પર્ધાનો સામનો કરવા દેશની સૌથી વધુ સબસ્ક્રાઈબર્સ ધરાવતી ટેલિકોમ કંપની ભારતી એરટેલે પણ વળતા પ્રહાર રૂપે ૪જી યુઝર્સ માટે રૂ.૧૪૯૪માં ૯૦ દિવસ સુધી ફ્રી ડેટા ઉપલબ્ધ બનાવવાની જાહેરાત કરી છે. એરટેલના જણાવ્યાં અનુસાર કંપનીના વર્તમાન ગ્રાહકો રૂ.૧૪૯૫માં તથા નવા ગ્રાહકો રૂ.૧૪૯૪ના પ્રથમ રિચાર્જ દ્વારા ૯૦ દિવસનું આ પેક મેળવી શકશે.

ભારતી એરટેલના ભારત-દક્ષિણ એશિયાના ઓપરેશન વિભાગના ડિરેક્ટર અજય પુરીના જણાવ્યાં અનુસાર ૪જી હેન્ડસેટ્સ ધરાવતાં ગ્રાહકો સામાન્ય રીતે ડેટાનો ઉપયોગ વધુ કરતાં હોય છે. આ નવું પેક તેમની જરૂરિયાતને ધ્યાનમાં રાખીને વિકસાવાયું છે. આ પેકની મદદથી ગ્રાહકો ડેટની ખપતની ચિંતા કર્યા વગર લાંબા સમય સુધી ઈન્ટરનેટનો વપરાશ કરી શકશે.

હાલમાં કંપની દ્વારા આ પેક માત્ર દિલ્હીમાં ઉપલબ્ધ બનાવાયું છે, જેને ટૂંક સમયમાં દેશના બાકીના સર્કલ્સમાં લોન્ચ કરાશે. રિલાયન્સ જિઓએ શરૂ કરેલી ફ્રી ડેટા તથા આજીવન ‌નિ:શુલ્ક વોઈસ કોલ્સની જાહેરાતથી ટેલિકોમ કંપનીઓ વચ્ચે રીતસરનું યુદ્ધ ફાટી નિકળ્યું. એકબીજા પર આક્ષેપ-પ્રતિઆક્ષેપો કરતી ટેલિકોમ કંપનીઓની આ લડાઈમાં છેવટે તો ગ્રાહકોને મહત્તમ લાભ થઈ રહ્યો છે. ટેલિકોમ કંપનીઓ વચ્ચેની હરીફાઈને પગલે વર્તમાન ગ્રાહકોને જાળવી રાખવા માટે કંપનીઓએ ડેટા રેટમાં ૬૭ ટકા સુધીનો જંગી ઘટાડો કરવાની ફરજ પડી છે.