BPએ કેસ્ટ્રોલ ઈન્ડિયામાં 8.53% હિસ્સો વેચ્યો, શેર 9% ઉછળ્યો

યુકેની બીપી પીએલસીએ કેસ્ટ્રોલ ઈ્ન્ડિયાનો ૮.૫૩ ટકા હિસ્સો વેચ્યો હતો. આ સોદાને પગલે બીપીનો કેસ્ટ્રોલ ઈન્ડિયામાં હિસ્સો ઘટીને ૫૧ ટકા થયો છે. અગાઉ મેમાં બીપીએ કંપનીમાં ૧૧.૫ ટકા હિસ્સાનું વેચાણ કર્યા બાદ વધુ હિસ્સો ઘટાડતા ૪.૨૨ કરોડ શેરનું વેચાણ કર્યું હતું. બે તબક્કામાં કરેલા વેચાણ બાદ પણ બીપી કેસ્ટ્રોલમાં ૫૧ ટકા હિસ્સા સાથે પ્રમુખ શેરધારક તરીકે યથાવત્ છે. આ સોદા પૂર્વે બીપીનો કેસ્ટ્રોલ ઈન્ડિયામાં હિસ્સો ૨૯.૩૮ કરોડ શેર અર્થાત ૫૯.૪૨ કરોડ શેર હતો. ભારતમાં લાંબા ગાળે રોકાણ જાળવી રાખવા માટે અમે પ્રતિબદ્ધ છીએ. દેશમાં અમારા ભાગીદારો દ્વારા અમે કુદરતી ગેસ અને ઓટોમોટિવ લ્યુબ્રિકન્ટ્સ માર્કેટિંગ ક્ષેત્રમાં વૃદ્ધિને આગળ ધપાવવાનો નિર્ધાર છે તેમ બીપીના ગ્રૂપ ચીફ એક્ઝિક્યુટીવ હોહ ડડલીએ જણાવ્યું હતું.
આ સોદાને પગલે બીપીના સ્ટાફ અથવા ગ્રાહકો કે વર્તમાન કરારને કોઈ પ્રતિકૂળ અસર નહીં થાય. બીપી પ્રમુખ શેરધારક સાથે વૃદ્ધિને આગળ લઈ જવા પ્રતિબદ્ધ છે તેમ બીપીના ભારતના વડા શશી મુકુન્દને જણાવ્યું હતું. બીએસઈમાં કેસ્ટ્રોલ ઈન્ડિયાનો શેર ૮.૭૯ ટકા વધીને રૂ.૪૫૯.૬૦ બંધ રહ્યો હતો. ઈન્ટ્રાડેમાં શેર રૂ.૪૭૦ની વર્ષની ટોચ નજીક પહોંચ્યો હતો.