ભારતના નવા નિયમોથી ચીનની કંપનીઓની મુશ્કેલીઓ વધી, પડી રહ્યો છે મોટો ફટકો

લદાખમાં ગાલવાન ખીણમાં ભારત અને ચીનના સૈનિકો વચ્ચે અથડામણ થઈ હતી અને તેમાં ભારતના 20 જવાનો શહીદ થયા હતા. ચીનના પણ 40 જવાનો માર્યા ગયા હતા પરંતુ ચીને તેની સત્તાવાર જાહેરાત કરી નથી. જોકે, ભારતીય જવાનોની શહીદી બાદ દેશભરમાં ચીનની કંપનીઓ અને તેના ઉત્પાદનોનો બોયકોટ થઈ રહ્યો છે અને તેની સામે વિરોધ વધી રહ્યો છે.

તાજેતરના સપ્તાહોમાં બ્યુરો ઓફ ઈન્ડિયન સ્ટાન્ડર્ડ્સ (બીઆઈએસ) દ્વારા મોબાઈલ ફોનના કમ્પોનન્ટ્સ અને ટીવીને મંજૂરી આપવામાં વિલંબ કર્યો છે જેના કારણે શાઓમી તથા ઓપ્પો જેવી કંપનીઓની યોજનાઓ મુશ્કેલીમાં મૂકાઈ ગઈ છે, તેમ ભારત અને ચીનના ઉદ્યોગોના સૂત્રોએ જણાવ્યું છે. જોકે, બીઆઈએસના ડાયરેક્ટર જનરલ પ્રમોદ કુમાર તિવારીએ આ અંગે કોઈ પ્રતિક્રિયા આપી નથી. જ્યારે ચીનની કોમર્સ મિનિસ્ટ્રી અને ફોરેન મિનિસ્ટ્રીએ પણ આ અંગે તાત્કાલિક કોઈ પ્રતિક્રિયા આપી નથી.

એક સિનિયર અધિકારીએ જણાવ્યું છે કે સરકારે નવી સ્ટાન્ડર્ડ પોલિસી પર કામ કર્યું છે અને ઓગસ્ટના અંત સુધીમાં તેની જાહેરાત કરવામાં આવે તેવી સંભાવના છે. આ નવી પોલિસીનો હેતું ચીન કે પછી અન્ય દેશોમાંથી આવતી હલકી ગુણવત્તાના સામાનને રોકવાનો છે. ઓળખ જાહેર ન કરવાની શરતે અધિકારીએ જણાવ્યું છે કે ક્વોલિટી સ્ટાન્ડર્ડ્સ અપગ્રેડ કરવામાં આવી રહ્યા છે તેવામાં પ્રોડક્ટ્સને મંજૂરી આપવામાં આવી રહી નથી કારણ કે તેનાથી ઘણી પ્રોડક્ટ લાઈન્સને અસર પડશે.

સ્માર્ટફોન્સ બનાવતી ચાઈનિઝ કંપની શાઓમી અને ઓપ્પો ભારતમાં ઘણી જ લોકપ્રિય છે. ભારતમાં વેચાતા 10 દસ સ્માર્ટફોન્સમાંથી આઠ આ બંને કંપનીના હોય છે. બંને કંપનીઓપોતાના મોટા ભાગના મોડલ્સનું એસેમ્બલ્સ ભારતમાં જ કરે છે અને કેટલાક કોમ્પોનન્ટ્સ ચીનથી આયાત કરે છે. આ ઉપરાંત વડાપ્રધાન નરેન્દ્ર મોદીએ ઈન્ડસ્ટ્રીને ડોમેસ્ટિક પ્રોડક્શન પર ભાર આપવાની અપીલ કરતા આત્મનિર્ભર ભારત યોજના જાહેર કરી છે. તેનાથી પણ આ કંપનીઓને ફટકો પડી શકે છે.

બીઆઈએસની રજિસ્ટ્રેશન સ્કીમમાં ઈલેક્ટ્રોનિકના કેટલાક સામાન ભલે તે આયાત કરેલો હોય કે પછી સ્થાનિક સ્તરે બનાવવામાં આવ્યો હોય પરંતુ તેણે ભારતીય સ્ટાન્ડર્ડ્સ પર ખરા ઉતરવું પડે છે. સર્ટિફાઈડ લેબોરેટરીમાં કંપનીઓની પ્રોડક્ટ્સને ટેસ્ટ કરવામાં આવે છે અને બાદમાં બીઆઈએસની મંજૂરી મળે છે. સૂત્રોએ જણાવ્યું છે કે સામાન્ય રીતે બીઆઈએસ 15 દિવસની અંદર આ પ્રક્રિયા પતાવે છે પરંતુ હવે તેમાં વિલંબ કરવામાં આવી રહ્યો છે. શુક્રવાર સુધીમાં 643 અરજીઓ રજિસ્ટ્રેશન માટે આવી છે જેમાંથી 394 અરજીઓ 20થી વધુ દિવસથી પેન્ડિંગ છે. જોકે, તેમાંથી કેટલી ચાઈનિઝ કંપનીઓની છે તે જાણી શકાયું નથી.