ફેડ રેટ છતાં સિટીગ્રૂપનો સેન્સેક્સનો 28,800નો ટાર્ગેટ યથવાત્

વૈશ્વિક નાણાકીય સેવા સંસ્થા સિટીગ્રૂપે યુએસ ફેડરલ રિઝર્વ દ્વારા વ્યાજ દરમાં વધારાની અપેક્ષા વ્યક્ત કરી છે. તાજેતરમાં યુએસ ફેડના ચેરપર્સન જેનેટ યેલનની સેન્ટ્રલ બેન્કોના વડાઓ સાથેની બેઠક બાદ વ્યાજ દર વધારાની શક્યતા મક્કમ બની હોવાનું નિવેદન કર્યું હતું. યુએસ ફેડ દ્વારા રેટ હાઈક છતાં બ્રોકરેજ હાઉસ સિટીગ્રૂપે ભારતીય ઈક્વિટી બજારમાં સેન્સેક્સનો ડિસેમ્બરના અંતે ૨૮,૮૦૦નો ટાર્ગેટ યથાવત્ રાખ્યો હોવાનું જણાવ્યું હતું.

બ્રોકરેજના મતે ભૂતકાળમાં યુએસ ફેડ દ્વારા વ્યાજ દર વધારો કરાયો હોવાના કેટલાક કિસ્સામાં ઈક્વિટીમાં સકારાત્મક વળતર મળ્યું હોવાનું જણાયું હતું. સિટીગ્રૂપના વિશ્લેષણ મુજબ સેન્સેક્સનો વર્ષાંતનો ટાર્ગેટ ૨૮,૮૦૦ યથાવત્ છેતેમજ સ્થાનિક ફંડામેન્ટલ્સ બજારની દોરવણી કરશે. મધ્યમ ગાળામાં ફેડની બેઠકમાં વ્યાજ દર વધારો કરાયા બાદ કોન્સોલિડેશનના ગાળામાં ખરીદીની તક જોવા મળી શકે છે. અગાઉ યુએસ ફેડ રેટમાં કરાયેલા વધારા પછી શેરો ઉપરાંત રૂપિયામાં પણ મિશ્ર ચાલ જોવા મળી હોવાનું સિટીગ્રૂપના અર્થશાસ્ત્રીઓનું માનવું છે. ૨૦૦૪માં ફેડ રેટમાં વધારાના તબક્કામાં રૂપિયો મજબૂત થયો હતો જ્યારે ૧૯૯૭માં રૂપિયામાં નરમાઈ રહી હતી.