રામનાથ કોવિંદ બીજા દલિત રાષ્ટ્રપતિ: 66% મત સાથે જંગી વિજય

નવી દિલ્હી:ભાજપ-એનડીએના ઉમેદવાર રામનાથ કોવિંદ દેશના 14મા રાષ્ટ્રપતિ બનશે. તેઓ પ્રણવ મુખરજીના અનુગામી બનશે. 71 વર્ષના રામનાથે ગુરુવારે થયેલી મતગણતરીમાં કોંગ્રેસ-યુપીએનાં ઉમેદવાર મીરાં કુમારને ધારણા મુજબ મોટી બહુમતી સાથે પરાજય આપ્યો છે.

કોવિંદને કુલ મતના બે તૃતીયાંશથી વધુ વોટ મળ્યા છે. ગુરુવારે સાંજે પૂર્ણ થયેલી મતગણતરી પછી કોવિંદને 7,02,044 મૂલ્યના 2,930 એટલે કે કુલ વેલિડ વોટના 65.65 ટકા મત મળ્યા હતા. મીરાં કુમારને 3,67,314 મૂલ્યના 1,844 વોટ મળ્યા હતા.

રાજ્યસભાના ભાજપના સાંસદ અને બિહારના રાજ્યપાલ તરીકે ફરજ બજાવનારા કોવિંદ દેશના બીજા દલિત રાષ્ટ્રપતિ બનશે. અગાઉ, પહેલા દલિત તરીકે આ સ્થાને કે આર નારાયણ રહી ચૂક્યા છે.

ઉપરાંત, ભાજપમાંથી દેશના સૌથી ઉચ્ચ હોદ્દા પર ચૂંટાનારા તેઓ પહેલા નેતા છે. 25મી જુલાઈએ તેમની રાષ્ટ્રપતિ તરીકે વિ‌‌ધિસર વરણી થશે. કોવિંદના વિજય સાથે ઉત્તરપ્રદેશના કાનપુર જિલ્લામાં આવેલા તેમના ગામ પરૌંખમાં શાનદાર ઉજવણી કરવામાં આવી હતી.

‘આ મારા માટે એક અત્યંત ભાવુક ઘડી છે.’ તેમ કોવિંદે ચૂંટાઈ આવ્યાની થોડી ક્ષણોમાં પોતાના નિવાસસ્થાનેથી કહ્યું હતું. તેમણે કહ્યું કે, આ દેશના દરેક નાગરિકની આકાંક્ષાઓ પૂર્ણ કરવા માટેની મને જવાબદારી મળી છે અને તે હું પૂરી પ્રામાણિકતા સાથે નિભાવીશ.

કોવિંદનો વિજય એટલા માટે નિશ્ચિત મનાતો હતો કેમ કે, એનડીએ પાસે સંસદમાં જીતવા માટેનું પૂરતું સંખ્યાબળ હતું. આ ઉપરાંત, તેમને ઓડિશાના મુખ્યમંત્રી નવીન પટનાયકના પક્ષ બીજેડી, નીતીશ કુમારની જેડી-યુ અને તેલંગણાના ટીઆરએસ તેમજ તામિલનાડુના એઆઇએડીએમકેનું સમર્થન પણ મળ્યું હતું.

કોવિંદના વિજયની સાથે સાથે એવા અહેવાલો મળ્યા છે કે ઉત્તરપ્રદેશ, ગુજરાત, ઝારખંડ અને ગોવામાંથી ક્રોસ વોટિંગ થયું છે અને કોંગ્રેસના વોટ પણ તેમને મળ્યા છે. ગુજરાતમાં કોંગ્રેસના 8 ધારાસભ્યોએ ક્રોસ વોટિંગ કર્યું હતું. આ સાથે એનસીપીના બે અને જીપીપીના નલીન કોટડિયાએ ક્રોસ વોટિંગ કર્યું હોવાનું જાણવા મળે છે.

ગુજરાતમાં રાષ્ટ્રપતિની ચૂંટણીમાં કુલ 182માંથી 181 ધારાસભ્યોએ મતદાન કર્યું હતું. જનતા દળના છોટુ વસાવાએ મતદાન કર્યું ન હતું, જ્યારે ભાજપના ધારાસભ્ય અમિત શાહે દિલ્હીમાંથી મતદાન કર્યું હતું.

ક્રોસ વોટિંગ કરનારા ધારાસભ્યોએ એનડીએના ઉમેદવાર રામનાથ કોવિંદને મત આપીને પક્ષના વ્હીપનો ભંગ કર્યો છે, જેને પગલે કોંગ્રેસ આ ધારાસભ્યોને સસ્પેન્ડ કરવા સુધીનાં પગલાં ભરી શકે છે. કોંગ્રેસના કુલ 57 ધારાસભ્યોમાંથી 8 ધારાસભ્યોએ પક્ષમાં જ નારાજગી વ્યક્ત કરવા માટે ક્રોસ વોટિંગ કર્યું હોવાનું ચર્ચાઈ રહ્યું છે.

કોવિંદને લોકસભા અને રાજ્યસભાના કુલ સાંસદોમાંથી 522 વોટ મળ્યા હતા, જ્યારે મીરાં કુમારને 225 સાંસદોનો ટેકો હતો. એનડીએ શાસિત રાજ્યોમાંથી આંધ્રપ્રદેશ, આસામ, અરુણાચલપ્રદેશ, છત્તીસગઢ, ગોવા, ગુજરાત અને ઝારખંડમાંથી કોવિંદને સૌથી વધુ વોટ મળ્યા હતા. મમતા બેનરજીના તૃણમૂલ શાસિત પશ્ચિમ બંગાળ, કોંગ્રેસના કર્ણાટક અને પંજાબમાંથી મીરાં કુમારને સૌથી વધુ વોટ પ્રાપ્ત થયા હતા.