CPI ઓક્ટોબરમાં 3.58%, 7 મહિનાની ટોચે

નવી દિલ્હી:રિટેલ ફુગાવો ઓક્ટોબરમાં સાત મહિનાની ઊંચી સપાટીએ પહોંચ્યો છે. આ સાથે આગામી મહિને RBIની ધિરાણનીતિની સમીક્ષામાં વ્યાજદરમાં ઘટાડાની શક્યતા ધોવાઈ ગઈ છે. કન્ઝ્યુ પ્રાઇસ ઇન્ડેક્સ (CPI) ગયા મહિને વધીને 3.58 ટકા થયો છે, જે સપ્ટેમ્બરમાં 3.28 ટકા હતો.

ડીબીએસ બેન્કના ઇકોનોમિસ્ટ રાધિકા રાવે જણાવ્યું હતું કે, રિઝર્વ બેન્કોનો માર્ચ 2018 માટેના ફુગાવાનો અંદાજ થોડો ઘટવાની શક્યતા હતી, ઓક્ટોબરમાં CPIના આંકડાને જોયા પછી આગામી ક્વાર્ટરમાં CPI 4 ટકાના લક્ષ્યાંકને સ્પર્શે તેવી શક્યતા છે, જે ડિસેમ્બર અને 2017-18માં RBI દ્વારા વ્યાજદર નહીં ઘટાડવાના અમારા અંદાજને પ્રબળ બનાવે છે. RBI 6 ડિસેમ્બરે ધિરાણનીતિની સમીક્ષા કરવાની છે. ઉલ્લેખનીય છે કે, ઓક્ટોબરનો CPI 3.5 ટકાના અંદાજિત ટાર્ગેટ કરતાં થોડો વધારે છે.

સરકાર દ્વારા 178 ચીજના GST ટેક્સ સ્લેબમાં ઘટાડા પછી આગામી કેટલાક મહિનામાં ફુગાવાનું દબાણ હળવું થવાની ધારણા છે. ઇકરાના પ્રિન્સિપાલ ઇકોનોમિસ્ટ અદિતી નાયરે જણાવ્યું હતું કે, ઘણી ચીજોના GST રેટમાં ફેરફારને કારણે ક્રૂડના ભાવમાં વૃદ્ધિની અસર સરભર થશે. CPI ફુગાવામાં 2017-18ના બીજા અર્ધવાર્ષિક ગાળામાં વૃદ્ધિ તરફી ટ્રેન્ડનો અંદાજ છે અને માર્ચ 2018માં તે 4.5 ટકાની આસપાસ રહેશે. એટલે ટૂંકા ગાળામાં વ્યાજદરમાં ઘટાડાની શક્યતા ઓછી છે.

ઉલ્લેખનીય છે કે, ગયા મહિનાની પોલિસીમાં RBIએ વ્યાજદરમાં કોઈ ફેરફાર કર્યો ન હતો. ઉપરાંત, ઓક્ટોબરથી માર્ચના ગાળામાં CPI વધીને 4.2-4.6 ટકાની રેન્જમાં રહેવાનો અંદાજ દર્શાવ્યો હતો, જે તેના 4 ટકાના મધ્યમ ગાળાના ટાર્ગેટ કરતાં વધારે છે. જૂનમાં 1.46 ટકાના સ્તરથી CPIમાં છેલ્લા કેટલાક મહિનામાં નોંધપાત્ર વૃદ્ધિ થઈ છે. ]]>