EILના શેર બાયબેકનો 25 જુલાઈથી પ્રારંભ

નવી દિલ્હી:સરકારી કંપની એન્જિનિયર્સ ઇન્ડિયા લિની રૂ.658.80 કરોડના શેરોની બાયબેક ઓફર 25 જુલાઈના રોજ ખૂલશે અને 7 ઓગસ્ટે બંધ થશે. લીડ મેનેજર આઇડીબીઆઇ કેપિટલ માર્કેટ્સ એન્ડ સિક્યોરિટીઝે આપેલી નોટિસમાં જણાવ્યું હતું કે ઇઆઇએલ પ્રતિ શેર રૂ.157ના ભાવે 4.19 કરોડ શેર બાયબેક કરશે. બીએસઇ પર ઇઆઇએલનો શેર રૂ.164.95 પર બંધ આવ્યો હતો.

નોટિસમાં જણાવાયું હતું કે બાયબેક કરવામાં આવનારા શેરો કંપનીના કુલ જારી થયેલા, સબસ્ક્રાઇબ થયેલા અને ભરપાઈ થયેલા શેરોમાં 6.23 ટકા હિસ્સો ધરાવતા હશે.

ઇઆઇએલના બોર્ડ ઓફ ડિરેક્ટર્સે 20 માર્ચ 2017ના રોજ શેર બાયબેકની મંજૂરી આપી હતી. શેરધારકોએ જૂનમાં પોસ્ટલ બેલેટ દ્વારા પ્રસ્તાવિત મંજૂરી આપી હતી. નોટિસમાં જણાવાયું હતું કે બાયબેક ઓફર માટેનું ભંડોળ કંપનીના આંતરિક રોકડ સંસાધનોમાંથી પૂરું પાડવામાં આવશે. સરકાર ઇઆઇએલમાં 57.02 ટકા હિસ્સો ધરાવે છે અને તેણે 20 માર્ચ 2017ના રોજના પત્રમાં આ બાયબેકમાં ભાગ લેવાની ઇચ્છા વ્યક્ત કરી છે અને તે 4.19 કરોડ સુધીની છે.

કંપની પોતાના જ શેરોનું બાયબેક કરવાની છે. તેનો હેતુ શેરધારકોને અનામત રોકડ પરત આપવાનો છે. સરકારે રોકડ પુરાંત ધરાવતા પીએસયુને શેર બાયબેક કરવા પ્રોત્સાહન આપ્યું છે, જેથી ડિસઇન્વેસ્ટમેન્ટનો લક્ષ્યાંક પૂરો કરી શકાય.

વર્તમાન નાણાકીય વર્ષ 2017-18માં તેણે માઇનોરિટી સેલ્સ, વ્યૂહાત્મક વિનિવેશ ઉપરાંત સરકારી વીમા કંપનીઓના લિસ્ટિંગ દ્વારા રૂ.72,500 કરોડ એકત્રિત કરવાનું આયોજન કર્યું છે. ઇઆઇએલ નવરત્ન પીએસયુ એકમ છે જે પેટ્રોલિયમ અને નેચરલ ગેસ મંત્રાલયના વહીવટી અંકુશ હેઠળ આવે છે. ]]>