ETFમાં EPFO રૂ.13K કરોડ રોકશે

મજૂર યૂનિયનોના વિરોધને કોરાણે મૂકીને, શ્રમ મંત્રાલયે વર્ષ ૨૦૧૬-૧૭માં એક્સ્ચેન્જ ટ્રેડેડ ફંડ્સ (ETFs)માં એમ્પ્લોયીઝ’ પ્રોવિડન્ટ ફંડ ઓર્ગેનાઇઝેશન (EPFO) દ્વારા કરાનારા મૂડીરોકાણની મર્યાદાને વધારીને ૧૦ ટકા કરી દીધી છે, જેના પરિણામે ચાલુ નાણાકીય વર્ષ દરમિયાન શેરબજારોમાં રૂ. ૧૩,૦૦૦ કરોડનો રોકાણ પ્રવાહ આવશે.
વર્ષ ૨૦૧૫-૧૬માં EPFOને તેની રોકાણપાત્ર આવકના પાંચ ટકા હિસ્સાનું જ ETFsમાં રોકાણ કરવાની છૂટ હતી. “ETFsમાં EPFOની રોકાણ મર્યાદાને હાલના પાંચ ટકાથી વધારીને ૧૦ ટકા કરતું જાહેરનામું અમે જારી કરી દીધું છે,” એવું શ્રમ પ્રધાન બંદારુ દત્તાત્રેયે જણાવ્યું હતું. EPFO ચાલુ નાણાકીય વર્ષના પ્રથમ છ મહિનામાં ETFsમાં રૂ. ૧,૫૦૦ કરોડનું રોકાણ કરી ચૂકી છે અને તે બાકીના છ મહિનામાં આશરે રૂ. ૧૧,૫૦૦ કરોડનું રોકાણ કરશે.
શ્રમ મંત્રાલયે EPFOના ટ્રસ્ટીઓની મંજૂરી મેળવી છે કે નહીં તે અંગે પૂછવામાં આવતા દત્તાત્રેયે જણાવ્યું હતું કે CBTની બેઠકમાં આ મુદ્દાની બે વખત ચર્ચા થઈ હતી. કેટલાક સદસ્યો ETF મૂડીરોકાણ વિરુદ્ધ અભિપ્રાય ધરાવતા હતાં. “સરકાર (શ્રમ મંત્રાલય) પાસે નિર્ણય લેવાની સત્તા બોર્ડ કરતા વધારે છે,” એવું તેમણે જણાવ્યું હતું. તેમના અભિપ્રાય મુજબ CBT જ્યારે કોઇ મુદ્દે નિર્ણય લઈ શકતી ન હોય તેવા સમયે કાનૂન (EPF એક્ટ) હેઠળ શ્રમ મંત્રાલય કામદારોના હિતમાં નિર્ણય લેવાની સત્તા ધરાવે છે.
જોકે મજૂર સંઘોએ EPFOના ટ્રસ્ટીઓની મંજૂરી મેળવ્યા વિના ‘એકતરફી’ નિર્ણય લેવા બદલ શ્રમ મંત્રાલયની ઝાટકણી કાઢી છે. શેરબજારના સંવેદનશીલ પ્રકારને અનુલક્ષીને મજૂર સંઘો શેરબજારમાં EPFO દ્વારા રોકાણનો વિરોધ કરતા આવ્યાં છે અને આ મુદ્દે લગભગ તમામ મજૂર સંઘો એકમત ધરાવે છે. ઓલ ઇન્ડિયા ટ્રેડ યુનિયન કોંગ્રેસના ડી. એલ. સચદેવે જણાવ્યું છે કે “અમારો વિરોધ હોવા છતાં ETFsમાં FPOના મૂડીરોકાણને બમણા કરતા સરકારના એકતરફી જાહેરનામાનો અમે મક્કમપણે વિરોધ કરીએ છીએ. અમે ટૂંક સમયમાં અન્ય યૂનિયનો સાથે આ મુદ્દાની ચર્ચા કરીશું અને તેની વિરુદ્ધમાં વિરોધ શરૂ કરીશું.”