Amazon સાથેની ટક્કરમાં Flipkartને 3,200 કરોડનું નુકસાન થયું

I am Gujarat

ફ્લિપકાર્ટને 3200 કરોડનું નુકસાન

દિગ્બિજય મિશ્રા, બેંગ્લોર: Amazon સાથેની સ્પર્ધામાં ઈ-કોમર્સ કંપની ફ્લિપકાર્ટે માર્ચ 2018માં પૂરા થયેલા નાણાંકીય વર્ષમાં 3200 કરોડ રૂપિયાનું નુકસાન વેઠવાનો વારો આવ્યો છે. ફ્લિપકાર્ટ ઈંડિયા અને ફ્લિપકાર્ટ ઈન્ટરનેટ ભારતમાં કંપનીનો બિઝનેસ સંભાળે છે. ફ્લિપકાર્ટ ઈન્ડિયાને 2000 કરોડથી વધુનું નુકસાન વેઠવું પડ્યું, જ્યારે ઓનલાઈન માર્કેટપ્લેસ પૂરું પાડતા ફ્લિપકાર્ટ ઈન્ટરનેટને 1100 કરોડ જેટલું નુકસાન થયું છે. માર્ચ 2017માં ફ્લિપકાર્ટ ઈન્ડિયાને 244 કરોડ રૂપિયાનું નુકસાન થયું જ્યારે માર્ચ 2016માં 545 કરોડનું નુકસાન થયું હતું.

આ કારણે વધ્યું નુકસાન

ગયા વર્ષની સરખામણીમાં આ વર્ષે વધેલા નુકસાનનું કારણ છે અમેઝોન સાથેની સ્પર્ધામાં ટકી રહેવા કરવામાં આવેલું આક્રમક માર્કેટિંગ અને ડિસ્કાઉન્ટ. હવે વૉલમાર્ટનો ભાગ બની ચૂકેલા ફ્લિપકાર્ટની આ સ્થિતિ હજુ 2020 સુધી રહેશે તેમ વિશ્લેષકોનું માનવું છે, કારણકે એમેઝોન સાથેની સ્પર્ધા વધતી જશે. ફ્લિપકાર્ટ ઈન્ડિયાની રેવન્યૂ ફિસ્કલ વર્ષ 2018માં 42 ટકા વધી જ્યારે ફિલ્પકાર્ટ ઈન્ટરનેટની રેવન્યૂમાં 36 ટકા વધારો જોવા મળ્યો. બંને કંપનીના કુલ ખર્ચમાં વધારો થયો.

ફ્લિપકાર્ટ ઈન્ડિયાનો ખર્ચ 50 ટકા વધ્યો

ફ્લિપકાર્ટ ઈન્ડિયાનો ખર્ચ 50 ટકા વધ્યો. આ ખર્ચમાં કર્મચારીઓને અપાતા લાભો પાછળ 330 કરોડ રૂપિયાનો ખર્ચ થયો જે અગાઉના વર્ષમાં 166 કરોડ રૂપિયા હતો. અમેઝોન પણ ભારતમાં ખૂબ ખર્ચો કરી રહ્યું છે. રિપોર્ટ પ્રમાણે, ભારતમાં માર્કેટ પ્લેસ ચલાવતી અમેઝોન સેલર સર્વિસે ફિસ્કલ વર્ષ 2018માં 4800 કરોડ રૂપિયાનું નુકસાન કર્યું છે, આ જ વર્ષે તેની રેવન્યૂ 3250 કરોડ હતી. જો કે હજુ સુધી અમેઝોન ઈન્ડિયાના નાણાંકીય આંકડા જાહેર કરવામાં આવ્યા નથી.

વિશ્લેષકનો મત

ફ્લિપકાર્ટે લોજિસ્ટિક અને પેમેન્ટ માટે અન્ય કંપનીઓ સાથે હાથ મિલાવ્યો છે જેમના નાણાંકીય આંકડા બહાર આવવાના બાકી છે. ફ્લિપકાર્ટ ગ્રુપની સિંગાપુર સ્થિત કંપનીએ માર્ચ 2017માં 8,771 કરોડ રૂપિયાની ખોટ કરી છે. વરિષ્ઠ વિશ્લેષક સતીષ મીણાના મતે, “ફ્લિપકાર્ટ પોતાના મહત્વના ક્ષેત્રે નવા યુઝર્સ એડ કરવાની વાત કરે છે. જો કે આ નવા યૂઝર્સ એક્ટિવ યુઝર્સની જેમ વધારે ખરીદી નથી કરતા. ફ્લિપકાર્ટ હવે વૉલમાર્ટ હસ્તગત છે એટલે 2019માં રોકાણની સ્પીડ ઘટશે અને તે પછીના વર્ષે પણ આમ થાય તો નવાઈ નહીં. અમેઝોને તાજેતરમાં યોજાયેલા એન્યુઅલ ફ્લેગશીપ સેલ વખતે ફ્લિપકાર્ટ સાથેનું અંતર ઘટાડવાનો પ્રયાસ કર્યો, જેથી વધુ માર્કેટ શેર મેળવી શકાય. જો કે ફ્લિપકાર્ટ પોતાનો માર્કેટ શેર સરળતાથી હાથમાંથી જવા નહીં દે. ફ્લિપકાર્ટ ફર્નિચર અને કરિયાણાના માર્કેટમાં ડગ માંડવાની કોશિશમાં છે.”