F&O સંકેત: વોલેટિલિટી સાથે તેજી ચાલુ રહેશે

મુંબઈ:નિફ્ટીએ તેની આગેકૂચ જારી રાખી છે અને ગુરુવારે તેણે 10,100નો આંક વટાવ્યો હતો. જાન્યુઆરી પછી ડેરિવેટિવ મંથલી સિરિઝમાં સૌથી શ્રેષ્ઠ પ્રદર્શન ગુરુવારે જોવા મળ્યું હતું. નિફ્ટી સળંગ બીજી વખત 10,000ની ઉપર બંધ રહી હતી પરંતુ સવારે તેમાં જે ઉછાળો હતો તે બધો બપોર પછી ધોવાઈ ગયો હતો.

ફેડરલ રિઝર્વે વ્યાજદરમાં ઝડપી વધારો નહીં કરવાના બુધવારે રાત્રે આપેલા સંકેત તથા બિહારમાં સત્તા પર એનડીઓના આગમનના કારણે બજારમાં તીવ્ર ઉછાળો હતો. નિફ્ટી ઝડપથી 10,100ને પાર કરી ગઈ અને 10,114.85ની ટોચ પર પહોંચી હતી જ્યારે સેન્સેક્સે 32,672ની ટોચ મેળવી હતી. પરંતુ રોકાણકારોએ નફો બુક કરતા બંને સૂચકાંક સપાટ બંધ રહ્યા હતા.

જુલાઈ ડેરિવેટિવ સિરિઝમાં નિફ્ટીમાં 5.4 ટકા અને સેન્સેક્સમાં 4.9 ટકાનો વધારો થયો છે. એનાલિસ્ટોએ બજારમાં અમુક કરેક્શનની આગાહી કરી ત્યાર બાદ મંથલી સિરિઝમાં આ સૌથી શ્રેષ્ઠ પ્રદર્શન છે. એડેલવાઇસ સિક્યોરિટીઝના ક્વોન્ટિટેટિવ રિસર્ચ હેડ યોગેશ રાડકેએ જણાવ્યું કે, અત્યારે પોઝિટિવ વલણ છે, પરંતુ બજાર જે રીતે વધ્યું છે તેને જોતા અમુક વોલેટિલિટીની અપેક્ષા છે. ૪૦૦થી ૫૦૦ પોઇન્ટના એક કરેક્શનને નકારી શકાય નહીં.

બિહારના મુખ્યમંત્રી નીતિશ કુમારે લાલુ યાદવ સાથે છેડો ફાડીને ભાજપ સાથે જોડાવાનો નિર્ણય લેતા એનડીએની આર્થિક સુધારા લાગુ કરવાની ક્ષમતામાં વધારો થશે તથા 2019ની ચુંટણી પછી પણ તે સત્તા પર આવશે તેમ માનવામાં આવે છે.

નિફ્ટી રોલઓવર 67 ટકા હતું જ્યારે માર્કેટ વાઇડ રોલઓવર 79 ટકા નોંધાયું હતું જે છેલ્લી ત્રણ એક્સપાયરી મુજબ જ છે. સ્ટોક ફ્યુચર્સ માટે રોલ કોસ્ટ અગાઉના 60-65 બીપીએસથી ઘટીને 54-56 બેસિસ પોઇન્ટ થયો હતો જે દર્શાવે છે કે બજાર થાક્યું છે.

લોંગ પોઝિશનને રોલઓવર કરવા માટેના ખર્ચને રોલ કોસ્ટ કહે છે અને તેમાં ઘટાડાનો અર્થ એ થયો કે રોકાણકારો આગામી સિરિઝમાં કેરી ફોરવર્ડ કરવા માટે વધારે ચુકવણી કરવા ઇચ્છુક નથી. માર્કેટ વાઇડ ફ્ચુચર્સ ઓપન ઇન્ટરેસ્ટ રૂ.1.12 લાખ કરોડ હતો જે અગાઉની સિરિઝમાં એક્સપાયરીના દિવસે રૂ.1.17 લાખ કરોડ નોંધાયો હતો.

ગયા મહિને મોટા ભાગે જોવા મળ્યું હતું તેમ આ વખતે અમુક શેર જ હાવી રહ્યા હતા. એચડીએફસી અને એચડીએફસી બેન્ક, યસ બેન્ક, કોટક મહિન્દ્રા બેન્ક અને એસબીઆઇ સૌથી વધુ વધ્યા હતા. એચડીએફસી 5.8 ટકા વધીને રૂ.1728 થયો હતો અને સેન્સેક્સમાં તે ટોપ પરફોર્મર છે. એચડીએફસી બેન્ક 2.2 ટકા વધીને રૂ.1787.95 થયો હતો. જ્યારે પસંદગીના આઇટી સ્ટોક્સ અને આઇટીસી ઘટવાના કારણે સૂચકાંક નીચે આવ્યો હતો.

મોતીલાલ ઓસવાલ ફાઇનાન્શિયલ સર્વિસિસના ડેરિવેટિવ્ઝ એનાલિસ્ટ ચંદન તાપરિયાએ સાવધાનીની સલાહ આપતા કહ્યું કે ઇન્ડેક્સનો પરફોર્મન્સ અમુક પસંદગીના શેર્સના કારણે જ છે અને ઊંચા સ્તરે ફોલો-અપ બાઇંગ ઓછું છે. નીચલી બાજુએ સૂચકાંકને 9800-9900ના સ્તરે સપોર્ટ છે.

ડેરિવેટિવ એનાલિસ્ટ્સના મતે એકંદરે ટ્રેન્ડ પોઝિટિવ છે. આઇસીઆઇસીઆઇ ડાયરેક્ટના ડેરિવેટિવ્ઝ હેડ અમીત ગુપ્તાએ કહ્યું કે બજારમાં અમુક કોન્સોલિડેશન આવી શકે પરંતુ આગામી મહિનાઓમાં નિફ્ટી 10,500ને વટાવે તેવી શક્યતા છે.