Expert Advice: આગામી દિવસોમાં Pfizer અને Phoenix Millsના શેર્સમાં કમાણીની શક્યતા પ્રબળ

BSE સેન્સેક્સ બુધવારે રેકોર્ડ ઉંચી સપાટીથી નીચે આવ્યો હતો અને બેન્કો અને ઈન્ફ્રાસ્ટ્રક્ચર કંપનીઓના શેરોમાં નફા બુકિંગના કારણે 37 પોઇન્ટના ઘટાડા સાથે બંધ રહ્યો હતો. બીએસઈ સેન્સેક્સ 37.40 અંક એટલે કે 0.08 ટકા તૂટીને 44,618.04 ની સપાટીએ બંધ રહ્યો હતો. જો કે, નેશનલ સ્ટોક એક્સચેંજનો નિફ્ટી 4.70 પોઇન્ટ અથવા 0.04 ટકાના નજીવા વધારા સાથે 13,113.75 પોઇન્ટ પર બંધ રહ્યો છે. ગઈ કાલે ઓએનજીસી, એશિયન પેઇન્ટ્સ, ટાઇટન, ટાટા સ્ટીલ અને બજાજ ઓટોના શેર્સ ટોચના લાભ કારક રહ્યા છે.

Pfizerમાં કમાણીની તક

ઇંગ્લેન્ડે Pfizer-BioNTech કોરોના રસીના ઉપયોગને મંજૂરી આપી છે. Pfizer-BioNTech રસીના ઉપયોગને મંજૂરી આપનાર તે વિશ્વનો પહેલો દેશ બન્યો છે. હાલ કંપનીએ કહ્યા મુજબ ભારત સાથે પણ તેઓ મંજૂરી માટે વાતચીત કરી રહ્યા છે તેવામાં ફાઇઝરનો શેર બુધવારે 2.44 ટકા વધીને બંધ થયો છે. આજે અને હાલના થોડા દિવસોમાં તેમાં મોટા ઉછાળાની શક્યતા વ્યક્ત કરાઈ રહી છે.


Phoenix Mills

ઇન્વેસ્ટમેન્ટ ગ્રુપ CLSAએ આ કંપની માટે ખરીદ રેટિંગ જાળવી રાખ્યું છે. બુધવારે તેનો શેર 11 ટકા વધ્યો હતો. તેનો શેર 765 પર બંધ રહ્યો હતો. રેટિંગ એજન્સીએ હવે આ કંપનીના શેરનું લક્ષ્ય વધારીને રુ. 872 કરી દીધું છે. તાજેતરમાં સિંગાપોર સોવરિન વેલ્થ ફંડ જીઆઈસીએ પણ કંપની સાથે કરાર કર્યો છે. જેના કારણે Phoenix Millsના શેર્સમાં હજુ પણ ઉછાળો આવી શકે તેવી શક્યતા છે.

INFOSYS

રોલ્સ રોયસ અને ઈન્ફોસિસે ભારતમાં એરોનોટિકલ એન્જિનિયરિંગ માટે જોડાણ કર્યુ છે. બંને કંપનીઓએ બુધવારે એક નિવેદનમાં જણાવ્યું હતું કે, ભારતમાં રોલ્સ રોયસના નાગરિક એરોનોટિક્સ વ્યવસાય માટે એન્જિનિયરિંગ અને સંશોધન તથા વિકાસ સેવાઓ વધારવા માટે કરાર કરવામાં આવ્યો છે. સંયુક્ત નિવેદનમાં કહેવામાં આવ્યું છે કે રોલ્સ રોયસ તેના ભાગીદારીના ભાગ રૂપે તેના ઇજનેરી કેન્દ્રની સિવિલ એરોનોટિકલ ક્ષમતાઓનો નોંધપાત્ર ભાગ ઇન્ફોસિસમાં સ્થાનાંતરિત કરશે. નિવેદનમાં કહેવામાં આવ્યું છે કે, મુખ્ય એન્જિનિયરિંગ સેવાઓ, ડિજિટલ ટ્રાન્સફોર્મેશન ક્ષમતાઓ અને ભાગીદારી દ્વારા રોલ્સ રોયસના પ્રોડક્ટ જ્ઞાન આધારિત ઇન્ફોસિસ દ્વારા હાઈએન્ડ એન્જિનિયરિંગ અને સંશોધત તથા વિકાસ સેવાઓનું ડિજિટલ સેવાઓના એકીકરણ સાથે રોલ્સ રોયસને ઉપલબ્ધ કરાવવામાં આવશે.