રૂપિયાની નબળાઈ કંપનીઓ માટે નેગેટિવ, અસર મર્યાદિત: મૂડીઝ

65763198 નવી દિલ્હી:મૂ઼ડીઝ ઇન્વેસ્ટર્સ સર્વિસના જણાવ્યા અનુસાર ચલણમાં નબળાઈનો ટ્રેન્ડ રૂપિયામાં આવક મેળવતી અને ડોલરમાં ઋણ ધરાવતી કંપનીઓ માટે ‘ક્રેડિટ નેગેટિવ’ રહેશે. રૂપિયો 2018માં 13 ટકા ઘટ્યો છે અને સોમવારે 72.67ની અત્યાર સુધીની નીચી સપાટીને સ્પર્શ્યો હતો.

મૂડીઝના વાઇસ પ્રેસિડન્ટ અને સિનિયર ક્રેડિટ ઓફિસર એનાલિસા દિચિઆરાએ જણાવ્યું હતું કે, “ઊંચું રેટિંગ ધરાવતી કંપનીઓ નેચરલ હેજિંગ સહિત વિવિધ વિકલ્પો ધરાવે છે. અમુક કંપનીઓ ડોલરમાં આવક અને ફાઇનાન્શિયલ હેજિંગ ધરાવે છે. જેથી ગુરુવાર (6 સપ્ટેમ્બર)ના મૂલ્ય (72.11)ની તુલનામાં વધુ 10 ટકાના સંભવિત ઘટાડાની અસર મર્યાદિત થઈ શકે.”

હાઈ યીલ્ડી અને ઇન્વેસ્ટમેન્ટ ગ્રેડ કેટેગરીમાં આવતી મૂડીઝના રેટિંગ હેઠળની 24 ભારતીય કંપનીઓમાંથી 12 કંપનીની મોટા ભાગની આવક અમેરિકન ડોલરમાં થાય છે અથવા તેમના કોન્ટ્રાક્ટ અમેરિકન ડોલરમાં હોય છે, જે કંપનીઓને નેચરલ હેજિંગ પૂરું પાડે છે. તેને લીધે રૂપિયામાં નબળાઈની અસર મર્યાદિત બને છે. મૂડીઝના રેટિંગ હેઠળની 24 કંપનીમાં IT, ઓઇલ-ગેસ, કેમિકલ્સ, ઓટો, કોમોડિટીઝ, સ્ટીલ અને રિયલ એસ્ટેટ સેક્ટરનો સમાવેશ થાય છે.
]]>