ભારતની GDP વૃદ્ધિ ચાલુ વર્ષે 7.3, 2020માં 7.5% રહેશે: IMF

68805026 વોશિંગ્ટન:IMFના જણાવ્યા અનુસાર ભારત 2019 અને 2020માં પણ વિશ્વના સૌથી વધુ ઝડપે વિકસતા અર્થતંત્રનું સ્થાન જાળવી રાખશે. રોકાણમાં સતત રિકવરી અને વપરાશ આધારિત માંગને કારણે ચાલુ વર્ષે ભારતીય અર્થતંત્ર 7.3 ટકા અને 2020માં 7.5 ટકાના દરે વિકાસ સાધશે. 2018માં ભારતનો વૃદ્ધિદર ચીનના 6.6 ટકાની તુલનામાં 7.1 ટકા રહ્યો હતો. IMFએ તાજેતરમાં ચીનની આર્થિક વૃદ્ધિ 2019માં 6.3 ટકા અને 2020માં 6.1 ટકા રહેવાનો અંદાજ વ્યક્ત કર્યો છે.

IMFના અહેવાલમાં જણાવ્યા અનુસાર “નેશનલ એકાઉન્ટ સ્ટેટિસ્ટિક્સમાં મોમેન્ટમ થોડું ધીમું પડવાનો સંકેત હતો. તેને લીધે ઓક્ટોબર 2018માં જારી કરાયેલા ‘વર્લ્ડ ઇકોનોમિક આઉટલૂક’ના અંદાજની તુલનામાં ભારતીય અર્થતંત્રની વૃદ્ધિના અંદાજમાં 2019માં 0.1 ટકા અને 2020માં 0.2 ટકા ઘટાડો કરાયો છે.” IMFના જણાવ્યા અનુસાર માળખાકીય સુધારાના સતત અમલ અને ઇન્ફ્રાસ્ટ્રક્ચરના અવરોધોને દૂર કરવાનાં પગલાંને કારણે ભારતની આર્થિક વૃદ્ધિ મધ્યમ ગાળામાં 7 ટકાથી થોડા નીચા સ્તરે સ્થિર થવાનો અંદાજ છે.