40 મિનિટ જેટલો સમય ડાઉન રહી ગૂગલની ઘણી સેવાઓ, લોકોને પડી ભારે હાલાકી

નવી દિલ્હી: આજે ગૂગલની ઘણી સેવાઓ ડાઉન થઈ ગઈ છે. સાંજ લગભગ 5.20 કલાકે ગૂગલની જીમેલ સેવા અને હેંગઆઉટ સહિત ઘણી સેવાઓ પર એરરનું પેજ જોવા મળ્યો. યુટ્યૂબ પર પણ એવી સ્થિતિ રહી. આ ઉપરાંત ગૂગલની પેમેન્ટ સર્વિસ ગૂગલ પે પણ કામ કરતી બંધ થઈ ગઈ હતી. જેના લીધે ઘણા લોકોના પેમેન્ટ અટવાઈ પડ્યા હતા. જોકે, ગૂગલ સર્ચ એન્જિન એટલે કે google.com કામ કરી રહ્યું હતું. ગૂગલનની આ સેવાઓ ખોટવાઈ જવાથી લોકોને ઘણી મુશ્કેલીઓનો સામનો કરવો પડ્યો. બાદમાં, લગભગ 40 મિનિટ પછી એટલે કે 6.00 વાગ્યાની આસપાસ ગૂગલની સેવાઓ ફરીથી શરૂ થઈ હતી.

હજુ ગૂગલની સેવાઓ ખોટવાયાને થોડી સેકન્ડો પણ નહોંતી થઈ, કે ટ્વિટર પર #YouTubeDOWN અને #googledown ટ્રેન્ડ કરવા લાગ્યું. કોઈ પોતાના જીમેલના એરર પેજનો સ્ક્રીન શોટ મૂકવા લાગ્યું તો, કોઈ ટ્યૂબની હાલત પર લોકોનું ધ્યાન ખેંચવા લાગ્યું. તો, હેંગઆઉટથી થઈ રહેલી મુશ્કેલીઓને પણ લોકો ટ્વિટર પર રિપોર્ટ કરવા લાગ્યા.

લોગિન વિના ચાલી રહ્યું હતું યુટ્યૂબ
આમ તો જો તમે યુટ્યૂબ ખોલવાનો પ્રયાસ કરશો તો યુટ્યૂબ નહીં ખૂલે, પરંતુ જો લોગિન વિના યુટ્યૂબ ખોલો છો તો તે બરાબર કામ કરતું હતું. એવામાં એ વાતની આશંકા વ્યક્ત કરવામાં આવી રહી હતી કે, ગૂગલની લોગિન સિસ્ટમ કામ નથી કરી રહી. ટ્વિટર પર તેને લઈને પણ કેટલાક લોકોએ પોતાની પરેશાની વ્યક્ત કરી હતી.

દુનિયાભરમાં બંધ થઈ હતી ગૂગલની સેવાઓ?
એવું નથી કે ગૂગલની સેવાઓ માત્ર ભારતમાં જ બંધ થઈ છે, પરંતુ સમગ્ર દુનિયામાં આવી ફરિયાદો આવી રહી છે અમેરિકાના કેલિફોર્નિયાથી પણ આવી ફરિયાદ આવી છે. ઉલ્લેખનીય છે કે, આ પહેલા 25 સપ્ટેમ્બરે પણ અમેરિકામાં જીમેલ સહિત ગૂગલની કેટલીક સેવાઓ ખોટવાઈ હતી.

ગૂગલનું શું કહેવું હતું?
જ્યારે ગૂગલના તમામ ટ્વિટર હેન્ડલ્સ પર નજર કરવામાં આવી તો, ગૂગલ કે ગૂગલ ઈન્ડિયા ટ્વિટર હેન્ડલ પર આ સમસ્યાને લઈને કોઈ સ્ટેટમેન્ટ જોવા ન મળ્યું. જોકે, યુટ્યૂબ ટીમના ટ્વિટર હેન્ડલે એમ જરૂર જણાવ્યું હતું કે, લોકોની આ મુશ્કેલી અંગે અમને જાણ થઈ છે અને તેમની ટીમ શક્ય તેટલું જલદી તેને કામ કરતું કરવા પ્રયાસ કરી રહી છે.