નવી દિલ્હી: ગૂગલ મુકેશ અંબાણીની રિલાયન્સ ઈન્ડસ્ટ્રીઝ (RIL)ના ટેલિકૉમ યૂનિટ જિયો પ્લેટફોર્મ્સમાં 4 અબજ ડૉલર (આશરે 30 હજાર કરોડ)નું રોકાણ કરી શકે છે. બ્લૂમબર્ગે આ અહેવાલ આપ્યા છે. બંને કંપનીઓ વચ્ચે આ ડીલ અંગે વાતચીત ચાલી રહી છે. ગૂગલ દુનિયાની સૌથી મોટી ટેક્નોલૉજી કંપનીઓમાંની એક છે. તેના સર્ચ એન્જિન અને મેઈલ એપ્લિકેશનને દુનિયામાં સૌથી વધુ યુઝ કરવામાં આવે છે.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
તાજેતરમાં જ ET સાથેના ઈન્ટરવ્યુમાં ગૂગલના ચીફ સુંદર પિચાઈએ જિયો પ્લેટફોર્મ્સમાં તેમની કંપનીના રોકાણની વાતને ન તો પુષ્ટિ કરી હતી કે ન તેને નકારી હતી. ગૂગલે આગામી પાંચ વર્ષમાં ભારતમાં 75,000 કરોડ રૂપિયા (આશરે 10 અબજ ડૉલર)ના રોકાણની પ્રતિબદ્ધતા દાખવી છે. તે દુનિયાની પાંચમી સૌથી મોટી અર્થવ્યવસ્થાના ડિજિટલ ઈકોસિસ્ટમમાં પોતાની સ્થિતિ મજબૂત કરવા માગે છે.
ગૂગલ જિયો પ્લેટફોર્મમાં ફેસબુકની સરખામણીએ બમણું રોકાણ કરી શકે છે. ફેસબુકે જિયો પ્લેટફોર્મ્સમાં 5.77 અબજ ડૉલરના રોકાણ માટે RIL સાથે ડીલ કરી છે. પિચાઈએ સોમવારે ETને આપેલા એક્સક્લુઝિવ ઈન્ટરવ્યુમાં કહ્યું હતું કે, જિયો પ્લેટફોર્મ્સમાં રોકાણ અને પાર્ટનરશિપ દ્વારા પૈસા લગાવી શકાય છે.
જો ગૂગલ અને જિયો પ્લેટફોર્મ્સની આ ડીલ પૂરી થાય છે તો આ મુકેશ અંબાણીની નવી ડીલ્સમાં વધુ એક નવી કડી હશે. તેમણે આ વર્ષે સિલિકૉન વેલીના ઘણા મોટા રોકાણકારો સાથે જિયો પ્લેટફોર્મ્સમાં રોકાણ માટે ઘણી ડીલ કરી છે. આનાથી રિલાયન્સ ઈન્ડસ્ટ્રીઝની સ્થિતિ ઈ-કૉમર્સ અને ટેક્નોલૉજી સેક્ટરમાં ખૂબ મજબૂત થઈ છે. અંબાણી રિલાયન્સ ઈન્ડસ્ટ્રીઝના ચેરમેન અને MD છે. જિયો પ્લેટફોર્મ્સ રિલાયન્સનું ટેલિકૉમ એકમ છે. તે જિયો ઈન્ફોકૉમના નામે મોબાઈલ સર્વિસિસ આપે છે.