પાર્થ સિંઘલ, મુંબઈ
મંગળવારે કામકાજની શરૂઆત થવાની સાથે જ કેન્દ્ર સરકારે સ્પેસિફાઈડ અંડરટેકિંગ ઑફ યૂનિટ ટ્રસ્ટ ઑફ ઇન્ડિયા (SUUTI)ના માધ્યમથી ITC કંપનીનો 2 ટકા હિસ્સો વેચી દીધો હતો. બ્લોક ડીલ્સના માધ્યમથી વેચેલા આ હિસ્સામાંથી સોમવારના વેલ્યુએશનના આધારે સરકારને લગભગ રૂ. 6700 કરોડ રૂપિયાની આવક થઈ હતી. તંબાકુ અને FMCGની દિગ્ગજ કંપની ITCમાં સરકારનો હિસ્સો લગભગ 11.12 ટકા જેટલો છે જે હવે ઘટીને 9.12 ટકા થઈ ગયો છે. ડીલ પછી ITCનો શેર 0.6 ટકા વધીને રૂ. 278 થઈ ગયો હતો. ઇટી નાઉના જણાવ્યા મુજબ ITCનો આ હિસ્સો સરકારી વીમા કંપની LICએ ખરીદ્યો હતો.
આ સાથે જ રૂ. 56,500ના ટાર્ગેટ સામે સરકારે ચાલુ નાણાંકીય વર્ષમાં કુલ 37,000 રુપિયા ભેગા કરી લીધા છે. યુનિટ ટ્રસ્ટ ઑફ ઇન્ડિયા (UTI)ના બે ટુકડા કર્યા બાદ વર્ષ 2003માં SUUTI અસ્તિત્વમાં આવ્યું હતુ. સરકારે ગેરન્ટીડ રિટર્ન સ્કીમ્સ SUUTI અંતર્ગત લઈ લીધી છે. જ્યારે કે રેગ્યુલર મ્યુચ્યુઅલ ફંડ સ્કીમને UTIમાં ટ્રાન્સફર કરી દેવાઈ છે જે હવે UTI મ્યુચ્યુઅલ ફંડના નામે ઓળખાઈ છે.
ITC ઉપરાંત સરકારે ખાનગી સેક્ટરની એક્સિસ બેન્કમાં 12 ટકા અને કન્સ્ટ્રક્શન તથા એન્જિનિયરિંગ સેક્ટરની દિગ્ગજ કંપની એલ એન્ડ ટીમાં 6.7 ટકાનો હિસ્સો રાખ્યો છે. સરકાર ફંડ ભેગુ કરવા માટે SUUTIમાં શેર્સમાં રોકાણ કરી રહી છે. ITCના શેર્સ વેચવા એ પણ આ જ એક રણનીતિનો ભાગ છે.