GSTથી GDPને વેગ મળશે; ટૂંકા ગાળા માટે નોંધપાત્ર જોખમ: ફિચ

નવી દિલ્હી:GST જટિલ છે પણ તેના લાગુ થવાથી સ્થાનિક વેપાર આડેની અડચણો દૂર થશે અને લાંબા ગાળે GDP વૃદ્ધિને વેગ મળશે, પરંતુ ટૂંકા ગાળા માટે તો નોંધપાત્ર જોખમનો સામનો કરવો પડશે એમ અમેરિકાની ક્રેડિટ રેટિંગ એજન્સી ફિચ રેટિંગ્સે જણાવ્યું છે.

વિવિધ માલ માટે ચાર પ્રકારના ટેક્સ સ્લેબ હોવાથી GST પ્રમાણમાં જટિલ ટેક્સ માળખું છે અને કંપની જેટલાં રાજ્યમાં બિઝનેસ કરતી હોય ત્યાંથી સતત ફાઇલિંગ કરવાની જરૂર પડે છે. પણ અગાઉના માળખા કરતાં તો ઘણું સરળ માળખું છે કારણ કે, પહેલાં પ્રત્યેક રાજ્ય પોતાના સેલ્સ ટેક્સ નક્કી કરતું હતું જ્યારે કેન્દ્ર સરકારના ટેક્સ તો ભરવાના થતા જ હતા.

આ સિવાય પહેલાં રાજ્યમાં પ્રવેશતાં પહેલાં બોર્ડર ટેક્સ પણ લાગતા હતા. GSTથી ઈનડાયરેક્ટ ટેક્સ સિસ્ટમ એક છત હેઠળ આવશે અને વેપાર આડેની અડચણો દૂર થશે, જેથી ઉત્પાદકતા વધશે અને લાંબા ગાળે GDPની વૃદ્ધિ વધશે.એમ ફિચે જણાવ્યું હતું.

એજન્સીએ જણાવ્યું હતું કે, GSTથી ટૂંકા ગાળે તો આવકમાં વધારો થવાની શક્યતા નથી. પરંતુ લાંબા ગાળે આવકને પરોક્ષ રીતે વેગ મળવાની શક્યતા છે કારણ કે, તેનાથી GDP વૃદ્ધિને વેગ મળશે અને ટેક્સના નિયમોનું પાલન કરવા માટે પ્રોત્સાહન મળશે.