કલ્પેશ ડામોર, અમદાવાદઃ ગુજરાતના લઘુ અને મધ્યમ ઉદ્યોગો (SME) એક્સચેન્જના માધ્યમથી ફંડ ઊભુ કરવામાં આખા દેશમાં અવ્વલ છે. 2017માં કુલ 72 લઘુ અને મધ્યમ ઉદ્યોગોએ ઈનિશિયલ પબ્લિક ઑફર્સ (IPO) લોન્ચ કર્યા હતા જેમાંથી 31 તો માત્ર ગુજરાતના જ છે. આખા દેશમાં IPOના માધ્યમથી ફંડ ઊભુ કરવામાં ગુજરાતની SME અવ્વલ છે. પેન્ટોમેથ કેપિટલના ડેટા અનુસાર રાજ્યની SMEએ મળીને IPOમાંથી રૂ. 373.47 કરોડનું ફંડ ઊભું કર્યું છે જે આખા દેશમાં સૌથી વધારે છે. ગુજરાતના ઉદ્યોગોએ BSE તથા NSE એમ બંને પ્લેટફોર્મ પરથી ફંડ ઊભુ કર્યું છે. ગુજરાત પછી બીજા ક્રમે મહારાષ્ટ્ર છે જેના 22 લઘુ-મધ્યમ ઉદ્યોગોએ IPOમાંથી 257.10 કરોડ ઊભા કર્યા છે. રાજસ્થાન અને મધ્ય પ્રદેશમાંથી ચાર તથા દિલ્હીમાંથી ત્રણ ઉદ્યોગોએ IPO બહાર પાડ્યા હતા. ગુજરાતની વાત કરીએ તો આ વખતે લેક્સસ ગ્રેનિટો (ઈન્ડિયા) લિમિટેડ, ઝોટા હેલ્થકેર લિમિટેડ, યુરો ઈન્ડિયા ફ્રેશ ફૂડ્સ લિમિટેડ, દેવ ઈન્ફોર્મેશન ટેક્નોલોજી લિમિટેડ અને ઓશનિક ફૂડ્સ લિમિટેડ જેવી કંપનીઓએ IPO લોન્ચ કર્યા હતા. સૌથી મોટા બે SME IPO ગુજરાતમાંથી જ લોન્ચ કરવામાં આવી હતી જેની સાઈઝ લગભગ રૂ. 50 કરોડ જેટલી હતી. ગુજરાતના SME IPO મેનેજ કરનાર પેન્ટોમેથ કેપિટલ એડવાઈઝર્સના મેનેજિંગ ડિરેક્ટર મહાવીર લુણાવતે જણાવ્યું, “IPO દ્વારા ફંડ ઊભુ કરવામાં ગુજરાતની કંપનીઓ સૌથી આગળ છે. ગુજરાતની SMEના નામે ઘણા રેકોર્ડ બોલે છે જેમ કે, 50 કરોડથી વધુનો IPO રેઈઝ કરવો અને QIBમાં સૌથી વધુ પાર્ટિસિપેશન.” ગુજરાતમાં અનેક ઈન્ડસ્ટ્રીયલ ક્લસ્ટર્સ આવેલા છે. જેમ કે મોરબીમાં સિરામિક, જામનગરમાં બ્રાસ, સુરતમાં ટેક્સટાઈલ અને અમદાવાદમાં ફાર્મા. લુણાવત વધુમાં જણાવે છે, “SME કેપિટલ માર્કેટ ફંડ ઊભુ કરીને ગુજરાતના લઘુ અને મધ્યમ ઉદ્યોગો માટે કોર્પોરેટ કંપનીઓ જેવી ઈકોસિસ્ટમ ઊભી કરે છે.” ગુજરાતમાં પણ અમદાવાદની કંપનીઓ સૌથી વધુ IPO સાથે આગળ આવી છે. અમદાવાદમાંથી કુલ 13 કંપનીઓએ IPO લોન્ચ કર્યા હતા જેમાંથી રૂ. 111.69 કરોડ ઊભા કરવામાં આવ્યા હતા. સુરતની કંપનીઓએ માત્ર ચાર જ IPOમાંથી 121.10 કરોડ ઊભા કર્યા હતા. આખા દેશમાં SME IPOના માધ્યમથી રૂ. 847 કરોડનું ફંડ ઊભુ કરવામાં આવ્યું હતું.
ગુજરાતના લઘુ-મધ્યમ ઉદ્યોગોએ IPOમાંથી ઊભુ કર્યું 373.47 કરોડનું ફંડ
TNN 29 Aug 2017, 7:45 am