HDFC બેન્કનો Q1 નફો 20 ટકા વધીને રૂ.3,893 કરોડ

મુંબઈ: ખાનગી ધિરાણકાર HDFC બેન્કે 30 જૂન, 2017ના રોજ પૂરા થયેલા ક્વાર્ટરમાં રૂ.3,893.84 કરોડનો ચોખ્ખો નફો નોંધાવ્યો છે જે, એક વર્ષ અગાઉના સમાનગાળાના રૂ.3,238.91 કરોડના ચોખ્ખા નફાની સરખામણીમાં 20.22 ટકાની વૃદ્ધિ દર્શાવે છે.

બેન્કની કુલ આવક રૂ.22,185.38 કરોડ નોંધાઈ હતી જે, એક વર્ષ અગાઉના સમાનગાળાની રૂ.19,322.63 કરોડની આવકની સરખામણીમાં 14.81 ટકાની વૃદ્ધિ દર્શાવે છે, તેમ બેન્કે BSEને પાઠવેલી સત્તાવાર યાદીમાં જણાવ્યું હતું.

30 જૂન સુધીમાં બેન્કની કુલ નોન પર્ફોર્મિગ એસેટ્સ (NPAs)સાધારણ વધીને કુલ ધિરાણના 1.24 ટકા થઈ હતી જે, ગત વર્ષના સમાનગાળામાં 1.04 ટકા હતી.

બેન્કની ચોખ્ખી નોન પર્ફોર્મિંગ એસેટ્સ સૂચિતગાળામાં બેન્કના કુલ ધિરાણના 0.44 ટકા નોંધાઈ હતી જે, એક વર્ષ અગાઉના સમાનગાળા દરમિયાન 0.32 ટકા હતી.

આજે બપોરે પરિણામ જાહેર થયા બાદ મુંબઈ શેરબજાર પર HDFC બેન્કના શેરનું 0.80 ટકાના ઉછાળા સાથે રૂ.1,717ના ભાવે ટ્રેડિંગ થઈ રહ્યું હતું.