હીરો મોટોકોર્પનો Q1 નફો 3.5% વધ્યો: વેચાણ નવી ટોચે

નવી દિલ્હી:અત્યાર સુધીના સૌથી વધુ ત્રિમાસિક વેચાણને પગલે હીરો મોટોકોર્પે 3.5 ટકાની વૃદ્ધિ સાથે રૂ.914.04 કરોડનો ચોખ્ખો નફો કર્યો છે. અગાઉના વર્ષના સમાન ગાળામાં કંપનીનો ચોખ્ખો નફો રૂ.883.09 કરોડ હતો. એપ્રિલ-જૂન ક્વાર્ટરમાં કંપનીની આવક 7.52 ટકા વધીને રૂ.8,612.91 કરોડ રહી છે, જે અગાઉના વર્ષના સમાન ગાળામાં રૂ.8,010.66 કરોડ હતી.

કંપનીએ પ્રથમ ત્રિમાસિક ગાળામાં 6.2 ટકાની વૃદ્ધિ સાથે 18,53,647 વાહનનું વેચાણ કર્યું છે, જે અગાઉના વર્ષના સમાન ગાળામાં17,45,389 વાહન હતું. હીરો મોટોકોર્પના ચેરમેન, એમડી અને સીઇઓ પવન મુંજાલે જણાવ્યું હતું કે, ચાલુ નાણાકીય વર્ષના પ્રથમ ક્વાર્ટરમાં સૌથી વધુ ત્રિમાસિક વેચાણ સાથે સ્થાનિક બજારમાં અમે સ્થિતિ વધુ મજબૂત કરી છે. બજારના એકંદર સેન્ટિમેન્ટમાં વૃદ્ધિ અને પ્રોત્સાહક માગને કારણે મોટરસાઇકલના સ્થાનિક વેચાણને વેગ મળ્યો હતો.

મુંજાલે જણાવ્યું હતું કે, વિશ્વના ઘણા અર્થતંત્ર અનિશ્ચિતતામાંથી પસાર થઈ રહ્યા છે ત્યારે ભારતનો આર્થિક અને રાજકીય માહોલ સ્થિર છે. ટુ-વ્હીલર સેગમેન્ટમાં માર્કેટ લીડર હીરો મોટોકોર્પ મેન્યુફેક્ચરિંગ સેક્ટરની વૃદ્ધિમાં મહત્ત્વની ભૂમિકા ભજવી રહી છે. નવા નાણાકીય વર્ષમાં પ્રોત્સાહક વૃદ્ધિની શક્યતા જણાય છે.

મુંજાલના જણાવ્યા અનુસાર આગામી કેટલાક ત્રિમાસિક ગાળામાં કંપની ઘણી નવી પ્રોડક્ટ્સ લોન્ચ કરશે. તેમણે કહ્યું હતું કે, અમે સ્થાનિક બજારમાં સ્થિતિ વધુ મજબૂત બનાવવા અને નવાં વૈશ્વિક બજારોમાં વિસ્તરણ માટે પ્રતિબદ્ધ છે.હીરો મોટોકોર્પનું પરિણામ બજાર બંધ થયા પછી જાહેર થયું હતું. કંપનીનો શેર મંગળવારે બીએસઇ પર 0.43 ટકા વધીને રૂ.3,706.85ના મથાળે બંધ રહ્યો હતો.

હીરો મોટોકોર્પની ગ્લોબલ બિઝનેસ ટીમ બ્રાન્ડ બિલ્ડિંગ માટે સક્રિય છે. ગ્રાહકો માટે લીધેલાં પગલાંને કારણે પ્રથમ ક્વાર્ટરમાં લેટિન અમેરિકા અને એશિયાનાં બજારોમાં સારી વૃદ્ધિ નોંધાઈ છે.