જેમની પાસે હ્યુન્ડાઈની કાર છે તે લોકો ખાસ વાંચે, કંપનીએ લોન્ચ કરી નવી સ્કીમ

નવી દિલ્હી: કોરિયાની ઓટો કંપની હુન્ડાઈએ ભારતમાં તેના નવા ગ્રાહકોને એક્સક્લુઝિવ લાભ અને વધારે સુવિધાઓ મળી રહે તે માટે ગુરુવારે 'હુન્ડાઈ મોબિલિટી મેમ્બરશિપ' લોન્ચ કરી છે.

બીજા તબક્કામાં આ મેમ્બરશિપ પ્રોગ્રામનો લાભ કંપની પોતાના બધા ગ્રાહકોને આપશે. જે નાણાંકીય વર્ષના ચોથા ક્વાર્ટરમાં શરૂ થશે. હુન્ડાઈ મોટર ઈન્ડિયા નવા ગ્રાહકોને આકર્ષવા માટે કેટલાક બેનિફિટ્સ પણ આ મેમ્બરશિપ દ્વારા ઓફર કરી રહી છે.

હુન્ડાઈએ પોતાના ગ્રાહકોને લાભ પહોંચાડવા વ્હીકલની જરૂરિયાતો ધરાવતી, મોબિલિટી સર્વિસ અને લાઈફસ્ટાઈલ સાથે સંકળાયેલી 20 કંપનીઓ સાથે હાલમાં પાર્ટનરશિપ કરી છે. આ પાર્ટનરોમાં મોબિસ, શેલ, જેકે ટાયર, રેવ, ઝૂમકાર, એવિસ, સવારી, ગાના, ઝી5, ઓટો, ડાઈનાઉટનો સમાવેશ થાય છે. હુન્ડાઈ આ પ્લેટફોર્મ પર વધારે પાર્ટનરોને સામેલ કરતી રહેશે.

હુન્ડાઈ મોટર ઈન્ડિયાના એમડી અને સીઈઓ એસ એસ કિમે કહ્યું કે, 'આ પ્રયાસ દ્વારા હુન્ડાઈનો હેતુ અમારા માનવંતા ગ્રાહકોના ઓટોમેટિવ અને તે ઉપરાંતના લાઈફટાઈમ પાર્ટનર બનવાનો છે. અમે નવા પ્રયોગો સાથે અમારા ગ્રાહકોની વિવિધ જરૂરિયાતો પૂરી કરીશું અને લાંબાગાળાના સંબંધો ઊભો કરીશું.'

તેમણે ઉમેર્યું કે, 'એક પ્લેટફોર્મ પર 20થી વધુ પાર્ટનરો અને મેમ્બરશિપ ફી વિના 'હુન્ડાઈ મોબિલિટી મેમ્બરશિપ'એ શરૂ કરેલી મુસાફરી નવા ગ્રાહકોને સગવડ અને સંતોષ પૂરા પાડશે.'