IL&FSને ડૂબવા નહીં દઈએ: LIC

65961493 નવી દિલ્હી/મુંબઈ:દેશની સૌથી મોટી વીમા કંપની લાઇફ ઇન્શ્યોરન્સ કોર્પોરેશન ઓફ ઇન્ડિયા (LIC)એ જણાવ્યું છે કે, દેવામાં ડૂબેલી ઇન્ફ્રાસ્ટ્રક્ચર લીઝિંગ & ફાઇનાન્શિલ સર્વિસિસ (IL&FS)ને ઉગારવા માટે કોઈ કસર છોડવામાં નહીં આવે અને તેને જોઈતી તમામ મદદ કરવામાં આવશે.

“IL&FS નહીં ડૂબે તેવી અમે ખાતરી આપીશું. અમે IL&FSને કારણે અન્ય ક્ષેત્રોમાં ગભરાટ ફેલાવા નહીં દઈએ.” એમ LICના ચેરમેન વીકે શર્માએ જણાવ્યું હતું. IL&FS મુશ્કેલીમાંથી બહાર આવી શકે તે માટે તેને મદદરૂપ થવા તમામ વિકલ્પો ખુલ્લા છે, જેમાં કંપનીમાં અમારો હિસ્સો વધારવાનો વિકલ્પ પણ સામેલ છે એમ શર્માએ ઉમેર્યું હતું. મંગળવારે નાણામંત્રી અરુણ જેટલી સાથેની બેઠક બાદ શર્માએ પત્રકારો સમક્ષ આ ટિપ્પણી કરી હતી.

જેટલીએ કહ્યું હતું કે, “અમે પરિસ્થિતિ પર ચાંપતી નજર રાખી રહ્યા છીએ અને LICના ચેરમેને જે કહ્યું તેમાં મારે વધારે કશું કહેવું નથી.” SBIના ચેરમેન રજનીશ કુમારે આ મુદ્દે જેટલી સાથે અલગથી બેઠક યોજી હોવાનું માનવામાં આવે છે.

માર્ચ ’18 સુધીની માહિતી મુજબ IL&FSનો 25.34 ટકા હિસ્સો LIC પાસે છે જ્યારે 23.5 ટકા હિસ્સા સાથે ઓરિક્સ કોર્પોરેશન ઓફ જાપાન બીજી સૌથી મોટી શેરહોલ્ડર છે.

દરમિયાનમાં, IL&FS માટે વધુ એક ખરાબ સમાચાર એ છે કે, ઇન્ડિયા રેટિંગ્સે મંગળવારે ગ્રૂપ કંપની IL&FS એન્વાયર્નમેન્ટલ ઇન્ફ્રાસ્ટ્રક્ચર એન્ડ સર્વિસિસ (IEISL)નું લોંગ-ટર્મ રેટિંગ ડાઉનગ્રેડ કર્યું છે અને તેના રેટિંગ્સને ‘વોચ’ હેઠળ મૂક્યું છે. એજન્સીએ તેના વિવિધ ડેટ ઇન્સ્ટ્રુમેન્ટ્સનું રેટિંગ પણ ઘટાડીને ‘BB’ કર્યું છે. હરીફ એજન્સી ઇકરાએ ગયા મહિને IL&FS ગ્રૂપની ઘણી કંપનીઓના રેટિંગ્સને જન્ક્ડ કર્યા હતા.

ઇન્ડિયા રેટિંગ્સનું આ ડાઉનગ્રેડ તેની પેરન્ટ IL&FS પર લેવાયેલા સમાન રેટિંગ એક્શનનું પ્રતિબિંબ છે. IL&FS કોમર્શિયલ પેપરના રિપેમેન્ટમાં ડિફોલ્ટ થયા બાદ એજન્સીએ તેનું રેટિંગ ડાઉનગ્રેડ કર્યું હતું. IL&FS ફાઇનાન્શિયલ સર્વિસિસ સોમવારે પાકતી કોમર્શિયલ પેપર્સના વ્યાજના પેમેન્ટ્સમાં ડિફોલ્ટ થઈ હતી.
]]>